مشیر برائے لیفٹیننٹ گورنر بصیر احمد خان نے کل کورونا میں ملوث پائے گئے شخص کو محض چار دن قرنطینہ میں رکھے جانے کے الزامات کے تناظر میں تحقیقات کا حکم دیا ہے۔ اسکے علاوہ انہوں نے جواہر ٹنل کا دورہ کرکے وہاں انتظامات کا جائزہ لیا۔
جواہر ٹنل اور قاضی گنڈ علاقوں کے دورے کے دوران بصیر احمد خان نے ڈی سی اننت ناگ کو اس حوالے سے ہدایت دی اور کہا کہ ’’کورونا کے خلاف جنگ میں کسی بھی قسم کی کوتاہی برداشت نہیں کیا جائے گا۔‘‘
انہوں نے کہا کہ ’’لاک ڈاؤن کی خلاف ورزی کرنے والوں کے ساتھ سختی سے نمٹا جائے گا جبکہ اشیاء ضروریہ کی سپلائی کو یقینی بنانے کے لیے بھی انتظامیہ نے پہلے ہی ٹھوس اقدامات اٹھائے ہیں۔‘‘
بصیر خان نے لوگوں سے تلقین کی کہ وہ ہر لحاظ سے اپنے آپ کو اس وبا سے محفوظ رکھیں اور لاک ڈاؤن کی مکمل پاسداری کریں۔‘‘
انہوں نے مزید کہا کہ ’’لاک ڈائون کسی کرفیو کے مانند نہیں کہ دن کو گھر میں رہ کر شام کو سڑکوں پر گھومنے کے لیے گھروں سے باہر آجائیں۔‘‘
اس موقعے پر انکے ہمراہ ڈی سی اننت ناگ، سی ایم او کولگام کے علاوہ دیگر کئی محکموں کے افسران بھی موجود تھے۔
واضح رہے کہ جنوبی کشمیر میں کورونا کے معاملات میں گزشتہ کئی روز سے تیزی سے اضافہ ہو رہا ہے۔ جبکہ اننت ناگ میں گزشتہ روز کورونا کا پہلا معاملہ سامنے آنے کے بعد لوگوں میں تشویش کی لہر دوڑ گئی ہے۔
