میرے میڈل جیتنے کے بعد لڑکیوں کی سوچ میں تبدیلی آئے گی: میرا بائی چانو

ٹوکیو اولمپک میں چاندی کاتمغہ جیت کر تاریخ رقم کرنے والی خاتون ویٹ لفٹر میرا بائی چانو نے ٹوکیو سے نئی دہلی میں صحافیوں سے بات چیت میں کہا کہ اس تمغے کے بعد ملک کی لڑکیوں کی سوچ میں تبدیلی آئے گی اور زیادہ سے زیادہ لڑکیاں کھیلوں میں سامنے آئیں گی۔

میرابائی چانو نے کہا 'میں کم لڑکیوں کو میدان میں اترتے دیکھتی ہوں لیکن میرے اس میڈل کے بعد ان کی سوچ میں تبدیلی آئے گی اور وہ زیادہ سے زیادہ تعداد میں کھیلوں میں اتریں گی۔

چاندی کا تمغہ جیتنے کے بعد میرابائی نے کہا کہ گزشتہ ریو اولمپک میں جو غلطیاں کی تھیں اس سے انہوں نے سبق لے کر پچھلے پانچ برسوں میں محنت کی جس کا اچھا نتیجہ سامنے آیا۔

میرا کے ساتھ ان کے کوچ وجے بھی بیٹھے ہوئے تھے۔ انہوں نے کہا کہ وہ 2014 سے میرا کے ساتھ ٹیم کے طور پر وابستہ تھے اورر یو میں ان سے امید تھی لیکن انہوں نے ریو کی ناکامی کے بعد میرا کے ساتھ سخت محنت کی اور پچھلی غلطیوں کو دور کرنے پر کام کیا۔

صحافیوں سے گفتگو کے دوران میرا بائی کے گلے میں ان کا تمغہ لٹکا ہوا تھا۔ انہوں نے بتایا کہ گزشتہ پانچ برسوں میں وہ صرف پانچ دن کے لیے اپنے گھر گئی تھیں اس دوران انہوں نے اپنی ساری توجہ صرف ٹریننگ پر لگا رکھی تھی۔