لوک سبھا اسپیکر اوم برلا نے پیر کے روز ایوان کے کام کاج کی شروعات کرتے ہوئے کہا کہ "مجھے آپ کو یہ بتاتے ہوئے خوشی ہو رہی ہے کہ پی وی سندھو نے اولمپک گیمس میں بیڈمنٹن ویمنز سنگلز میں بھارت کے لیے کانسے کا تمغہ جیتا ہے۔ یہ ان کا مسلسل دوسرا اولمپک تمغہ ہے۔ وہ انفرادی مقابلوں میں دو اولمپک تمغے جیتنے والی پہلی بھارتی خاتون کھلاڑی بن گئی ہیں۔
انہوں نے کہا کہ وہ اس ایوان کی جانب سے اس تاریخی کامیابی پر مبارکباد پیش کرتے ہیں۔ امید ہے کہ ان کا یہ کارنامہ اس ملک کے نوجوانوں کے لیے تحریک کا باعث ثابت ہوگا۔
اس کے علاوہ سندھو کی جانب سے کامیابی اور کانسہ کا تمغہ جیتنے پر مختلف قائدین ورہنماؤں نے بھی انہیں مبارکبار پیش کی، جس میں قابل ذکر نائب صدر ایم وینکیا نائیڈو ، وزیر اعظم مودی، کانگریس قائد راہل گاندھی شامل ہیں۔
وزیر اعظم نریندر مودی نے ٹوکیو اولمپکس میں بیڈمنٹن میں کانسے کا تمغہ جیتنے پر پی وی سندھو کو مبارکباد دی ہے۔ وزیر اعظم نے کہا کہ پی وی سندھو ہندوستان کا فخر اور ہمارے بہترین اولمپک کھلاڑیوں میں سے ایک ہے۔
یہ بھی پڑھیں:
Tokyo Olympics: پی وی سندھو کو اعلیٰ قائدین کی مبارکباد
Tokyo Olympics: بھارت کی خواتین ہاکی ٹیم سیمی فائنل میں پہنچی
واضح رہے کہ پی وی سندھو نے اولمپکس میں کانسے کا تمغہ جیت کر ملک کا نام روشن کیا ہے۔ اس سے قبل وہ اولمپکس میں چاندی کا تمغہ جیت چکی ہیں۔ اس طرح وہ اولمپک کھیلوں میں دو تمغے جیتنے والی پہلی ہندوستانی خاتون کھلاڑی بن گئی ہیں۔
سندھو نے چینی شٹلر کو پہلے سیٹ میں 13-21 اور دوسرے سیٹ میں 15-21 سے شکست دے کرکے بھارت کو دوسرا میڈل دلایا۔ اس سے پہلے بھارت کی جانب سے میرابائی چانو نے ویٹ لفٹنگ میں چاندی کا میڈل جیتا ہے۔
