شطرنج فیڈریشن کے نومنتخب صدر ڈاکٹر سنجے کپور نے شطرنج اولمپیاڈ کے لیے بولی لگانے کے فیصلے کے ساتھ ساتھ ملک کو شطرنج کا سُپر پاور بنانے کے عزم کا اظہار کیا ہے۔
قومی دارالحکومت دہلی میں منعقد سالانہ میٹنگ کے بعد پریس کانفرنس کے دوران سنجے کپور نے کہا کہ 'ہم چاہتے ہیں کہ بھارت دنیا کے لیے شطرنج کا اہم سینٹر بن جائے۔ ہم نے اس مقصد کو حاصل کرنے کے لیے ایک تفصیلی منصوبہ اور خاکہ تیار کیا ہے۔'
انہوں نے کہا کہ 'ایک طویل عرصے سے ہم اس کھیل کو مزید مقبول بنانے اور شہرت کی بلندی پر لے جانے کے لیے بین الاقوامی فلیور کے ساتھ 'انڈین چیس لیگ' شروع کرنے کے خواہاں ہیں۔'
کانپور کرکٹ ایسوسی ایشن کے چیئرمین رہ چکے ڈاکٹر سنجے کپور کپور نے بتایا کہ 'فرنچائز ماڈل کا پہلا ایڈیشن اس سال سے ترتیب دیا جائے گا۔'
ڈاکٹر کپور نے مزید کہا کہ 'اے جی ایم میں ویمنز گراں پری کی میزبانی کرنے کا بھی فیصلہ کیا گیا ہے جو خواتین چیمپین شپ کا ایک اہم حصہ ہے تاکہ ملک میں خواتین کھلاڑیوں کو بڑا اسٹیج ملے اور شطرنج کا بھی فروغ ملے۔'
انہوں نے کہا کہ 'ہم اسکولی سطح پر شطرنج کو مقبول بنانے کے لیے اسکولوں میں پروگرام بھی شروع کرنے جارہے ہیں۔ ہمارے تمام ریاستوں سے وابستہ افراد بیک وقت اس پر عمل درآمد کریں گے۔ ہم چاہتے ہیں کہ ہر طالب علم شطرنج کھیلے۔'
اے جی ایم میں لیے گئے دیگر اہم فیصلوں میں تمام کھلاڑیوں کے لیے وِنڈو رجسٹریشن، سینٹر آف ایکسلینس اینڈ آرگنائزیشن آف سُپر ٹورنامنٹ کا قیام بھی شامل ہے۔
فیڈریشن کے جنرل سکریٹری بھرت سنگھ چوہان نے سِنگل وِنڈو رجسٹریشن کے عمل کی اہمیت کو واضح کرتے ہوئے کہا کہ اب سے ہر کھلاڑی کو اپنے ضلع، ریاست اور خود ہی اے آئی سی ایف کے لیے رجسٹرڈ کیا جائے گا۔
انہوں نے کہا کہ 'سینٹر آف ایکسلینس نِچلی سطح پر صلاحیتوں کو نکھارنے اور تربیت دینے میں مدد فراہم کرے گا اور دنیا کی ٹاپ 50 رینکنگ میں بھارت کے کم سے کم 10 کھلاڑیوں کو شامل کرنے کا ہدف ہوگا۔
