ممبئی انڈینز نے کیرون پولارڈ سمیت 13 کھلاڑیوں کو رہا کیا ہے۔ دوسری طرف ممبئی نے جیسن بہرنڈورف کو ٹریڈنگ کے ذریعے ٹیم میں لے لیا ہے۔ لکھنؤ نے جیسن ہولڈر اور منیش پانڈے جیسے کھلاڑیوں کو رہا کرنے کا فیصلہ کیا
چنئی سپر کنگز (سی ایس کے) نے انڈین پریمیئر لیگ (آئی پی ایل) کے 2023 سیزن کی نیلامی سے قبل ٹیم کے سرکردہ آل راؤنڈر ڈوین براوو سے معاہدہ ختم کردیا ہے۔ سی ایس کے نے منگل کو اپنی سرکاری ویب سائٹ پر یہ جانکاری دی۔
سی ایس کے نے مطلع کیا کہ براوو، ایڈم ملنے، رابن اتھپا، کرس جارڈن، نارائن جگدیسن، ہری نشانت، کے ایم آصف اور بھگت ورما کو نیلامی سے پہلے معاہدہ سے آزادکردیا گیا ہے۔
براوو 2011 سے سپر کنگز کا حصہ تھے اور انہوں نے 116 آئی پی ایل میچوں میں سپر کنگز کی نمائندگی کی۔ آل راؤنڈر براوو نے اس دوران 137.15 کے اسٹرائیک ریٹ سے 1004 رنز بنائے جبکہ گیند کے ساتھ 140 وکٹیں بھی حاصل کیں۔ ٹرینیڈاڈ اور ٹوباگو سے تعلق رکھنے والے 39 سالہ کرکٹر نے سی ایس کے کے ساتھ تین بار (2011، 2018 اور 2021) آئی پی ایل ٹائٹل جیتا ہے۔
اس کے علاوہ چنئی نے تجربہ کار بلے باز رابن اتھپا کو بھی معاہدے سے آزادکیا۔ اتھپا نے اس سال 14 ستمبر کو ہندوستانی کرکٹ کے تمام فارمیٹس سے ریٹائرمنٹ کا اعلان کیا۔ دائیں ہاتھ کے بلے باز نے سپر کنگز کی جانب سے 16 میچ کھیلے جس میں انہوں نے 345 رنز بنائے۔ اتھپا 2021 کی آئی پی ایل جیتنے والی سی ایس کے اسکواڈ کا حصہ تھے۔
شاہ رخ خان کی ٹیم کولکاتہ نائٹ رائیڈرز نے آئی پی ایل نیلامی 2023 سے قبل شریاس ایر سمیت 14 کھلاڑیوں کو برقرار رکھا ہے۔ ساتھ ہی پیٹ کمنز سمیت 16 کھلاڑیوں کو ریلیز کیا گیا ہے۔
