ترواننت پورم: کیرالہ کی ایک بااثر سنی تنظیم ریاست میں فٹ بال کے جنون میں مبتلا مسلم نوجوانوں کے خلاف سامنے آئی ہے۔ تنظیم سے وابستہ ایک عالم دین نے کہا کہ ورلڈ کپ میں حصہ لینے والی ٹیموں کی حمایت میں اسٹار کھلاڑیوں کے بڑے کٹ آؤٹ لگانا اور فٹبال کھلاڑیوں سے جنونی محبت ظاہر کرنا اسلامی تعلیمات کے برعکس ہے۔ سمستھا کیرالہ جمعیت العلماء کے تحت قطبہ سمیتی کے جنرل سکریٹری ناصر فیضی کوداتھائی نے ارجنٹائن کے لیونل میسی، پرتگال کے کرسٹیانو رونالڈو اور نیمار جونیئر جیسے فٹبال اسٹارز کے بڑے کٹ آؤٹس لگانے کو غلط قرار دیتے ہوئے فٹ بال شائقین کو تشویش میں مبتلا کر دیا ہے۔ عالم دین نے مزید کہا کہ کیرالہ میں پرتگالی پرچم لہرانا بھی غلط ہے کیونکہ اس نے کئی ممالک پر جبراً حکومت کی تھی۔
عالم دین نے قطر میں جاری فٹ بال ورلڈ کپ کی وجہ سے طلباء میں پڑھائی میں عدم دلچسپی کے بارے میں بھی بات کی۔ انہوں نے کہا کہ بھارتی شہریوں کے لیے قومی پرچم کے بجائے دوسرے ممالک کے جھنڈوں کا لہرانا درست نہیں ہے۔ تاہم انہوں نے مزید کہا کہ تنظیم فٹ بال کے خلاف نہیں ہے۔ عالم دین کا مزید کہنا تھا کہ کھیل کو کھیل کے جذبے سے دیکھنا چاہیے۔ فٹ بال ایک بخار بنتا جا رہا ہے اور لوگ اس کے عادی ہوتے جا رہے ہیں۔ یہ اچھا عمل نہیں ہے۔ کوداتھائی کے مطابق، فٹ بال کو محض ایک ایسے کھیل کے طور پر فروغ دینا چاہیے جو جسمانی سرگرمیوں کی حوصلہ افزائی کرتا ہے۔ انہوں نے کہا کہ اس کے بجائے اب فٹبال بخار بن چکا ہے اور شائقین فٹبال کے اسٹار کھلاڑیوں کی پوجا کرنے میں مصروف ہیں۔
واضح رہے کہ کیرالہ فٹ بال کے شائقین کے لئے مشہور ہے۔ اس بار بھی فٹبال ورلڈ کپ شروع ہوتے ہی ریاست بھر میں میسی، نیمار جونیئر اور رونالڈو سمیت فٹبال اسٹارز کے دیوہیکل کٹ آؤٹ دیکھے گئے۔ اسی دوران کچھ شائقین نے ریلی نکالی اور اپنی اپنی ٹیموں کے جھنڈے لہرا کر اپنی حمایت کا اظہار کیا۔ یہاں لوگ برازیل اور ارجنٹائن کے شائقین کی طرح جوش و خروش سے فٹبال ورلڈ کپ دیکھتے ہیں۔
یہ بھی پڑھیں : Fifa World Cup 2022 دوربین میں شراب چھپا کر گراؤنڈ میں داخل ہونے والا شخص پکڑا گیا
