بھونیشور: بھارتی مردوں کی ہاکی ٹیم کے کوچ گراہم ریڈ نے ورلڈ کپ 2023 میں بھارت کی مایوس کن کارکردگی کے بعد اپنے عہدے سے استعفیٰ دے دیا ہے۔ ہاکی انڈیا نے پیر کو اس کی تصدیق کی اور کہا کہ ریڈ نے ورلڈ کپ کے اختتام کے ایک دن بعد ہاکی انڈیا کے صدر دلیپ ٹرکی کو اپنا استعفیٰ پیش کر دیا ہے۔ بھارت نے گھریلو سرزمین پر مسلسل دوسری بار مردوں کے ہاکی ورلڈ کپ میں نواں مقام حاصل کیا تھا۔ دو جیت اور ایک ڈرا کے ساتھ اپنے پول میں دوسرے نمبر پر رہنے کے بعد ہندوستان نے ایک کراس اوور میچ میں نیوزی لینڈ کا سامنا کیا جہاں وہ شوٹ آؤٹ میں 4-5 (فل ٹائم 3-3) سے ہار گئے۔ ریڈ کو اپریل 2019 میں ہیڈ کوچ کے عہدے پر تعینات کیا گیا تھا۔ ہندوستان نے ان کی قیادت میں ٹوکیو اولمپکس 2021 میں کانسی کا تاریخی تمغہ جیتا تھا۔ اس کے علاوہ ہندوستانی ٹیم کامن ویلتھ گیمز 2022 میں چاندی کا تمغہ دلانے میں بھی کامیاب رہی تھی۔
ریڈ کے استعفیٰ کے بعد، ٹرکی اور ہاکی انڈیا کے جنرل سکریٹری بھولناتھ سنگھ نے ٹیم کی کارکردگی اور مستقبل کی پالیسیوں پر تبادلہ خیال کرنے کے لیے کھلاڑیوں اور معاون عملے سے ملاقات کی۔ ریڈ کے ساتھ ساتھ تجزیاتی کوچ گریگ کلارک اور سائنسی مشیر مچل ڈیوڈ پیمبرٹن نے بھی اپنے استعفے ٹرکی کے سپرد کئے ۔ تینوں کوچ اگلے تین ماہ تک ہندوستانی ٹیم سے وابستہ رہیں گے۔ ریڈ کے یادگار دور کے آغاز کے دو ماہ بعد ہندوستان نے ایف آئی ایچ سیریز فائنلز کا خطاب جیتا تھ۔ا چند ماہ بعد، ٹیم نے بھونیشور میں منعقدہ کوالیفائرز جیت کر ٹوکیو اولمپکس کے لیے بھی کوالیفائی کیا۔
یہ بھی پڑھیں: Hockey World Cup 2023 بھارت ہاکی ورلڈ کپ سے باہر، نیوزی لینڈ نے پنالٹی شوٹ آؤٹ میں شکست دی
ٹوکیو اولمپکس اور کامن ویلتھ گیمز میں تمغے جیتنے کے بعد ہندوستان نے ایف آئی ایچ ہاکی پرو لیگ 2021/22 میں بھی تیسری پوزیشن حاصل کی تھی۔ آسٹریلیا کی اولمپک چاندی کا تمغہ جیتنے والی ٹیم کے رکن ریڈ نے اپنی تقریباً چار سالہ مدت کار کے بارے میں کہا ’’یہ وقت ہے کہ میں عہدہ چھوڑ کر اگلی انتظامیہ کو باگ ڈور سونپ دوں۔‘‘ اس ٹیم اور ہاکی انڈیا کے ساتھ کام کرنا ایک اعزاز اور فخر کی بات ہے۔ میں نے اس شاندار سفر کے ہر لمحے کا لطف اٹھایا ہے۔ میں ٹیم کے لیے نیک خواہشات کا اظہار کرتا ہوں۔ ریڈ کا استعفیٰ قبول کرنے کے بعد، ٹرکی نے کہا ’’ہندوستان ہمیشہ گراہم ریڈ اور ان کی ٹیم کا شکر گزار رہے گا کہ وہ ملک کے لیے اچھے نتائج لائے، خاص طور پر اولمپک کھیلوں میں۔ جیسا کہ ہر سفر ایک نئی سمت میں آگے بڑھتا ہے، اب وقت آگیا ہے کہ آپ اپنی ٹیم کے لیے ایک نیا نظریہ اختیار کریں۔
یو این آئی
