برمنگھم: عالمی چیمپئن نکہت زرین، نیتو گنگھاس اور حسام الدین محمد 2022 کامن ویلتھ گیمز باکسنگ ایونٹ کے سیمی فائنل میں پہنچ گئے ہیں۔ اسی دوران اولمپک میں کانسے کا تمغہ جیتنے والی لولینا بورگوہین کوارٹر فائنل میں اپ سیٹ کا شکار ہو گئیں۔ بھارتی باکسر لولینا بورگوہین 66 سے 70 کلوگرام کیٹیگری کے کوارٹر فائنل میں ہارنے کے بعد کامن ویلتھ گیمز سے باہر ہو گئی ہیں۔ انہیں ویلز کی روزی ایکلس نے 3-2 سے شکست دی۔ Commonwealth Games 2022
نکہت زرین نے خواتین کے 50 کلوگرام زمرے میں ویلز کی ہیلن جونز کو 5.0 پوائنٹس سے شکست دی۔ تینوں راؤنڈز میں نکہت کو برتری حاصل تھی اور انہوں نے اپنے حریف کو جارحانہ ہونے کا کوئی موقع نہیں دیا۔ اس کے علاوہ دو بار کی طلائی تمغہ فاتح نیتو (21 سال) کو 48 کلوگرام کے کوارٹر فائنل کے تیسرے اور آخری راؤنڈ میں اس کے شمالی آئرلینڈ کی حریف نکول کلائیڈ کے رضاکارانہ طور پر ریٹائر ہونے (ABD) کے بعد فاتح قرار دیا گیا۔ جس سے برمنگھم میں ملک کا پہلا باکسنگ میڈل یقینی ہوگیا ہے۔ Indian Boxers in Commonwealth Games
اس کے بعد نظام آباد کے 28 سالہ حسام الدین نے مَردوں کے 57 کلوگرام میں نمیبیا کے ٹریگین مارننگ اینڈییلو کو 4-1 سے شکست دے کر دوسرا تمغہ حاصل کرنے کے لیے آخری چار میں جگہ بنائی۔ پچھلے مرحلے کے کانسے کا تمغہ جیتنے والے حسام الدین کو اپنے مقابلے کے الگ فیصلے میں سخت جدوجہد کرنی پڑی۔ Husaamuddin Confirm Medal
اس سے قبل بھیوانی کے دھنانا ضلع سے تعلق رکھنے والی نیتو نے پہلے دو راؤنڈ میں کلائیڈ پر غلبہ حاصل کیا جس کے بعد میچ روک دیا گیا اور نتیجہ بھارتی باکسر کے حق میں آیا۔ نیتو، جو اپنا کامن ویلتھ گیمز میں ڈیبیو کر رہی ہیں، لیجنڈری باکسر ایم سی میری کوم کے وزن کے زمرے میں کھیل رہی ہیں۔ میری کوم سلیکشن ٹرائلز کے دوران زخمی ہوگئی تھیں۔ بھارتی ٹیم نے برمنگھم آنے سے پہلے آئرلینڈ میں ٹریننگ کی تھی اور اس سے نیتو کو کلائیڈ کے خلاف میچ میں مدد ملی۔
کوارٹر فائنل جیتنے کے بعد پُراعتماد نیتو نے کہا کہ 'یہ حریف باکسر کے خلاف میرا پہلا میچ تھا لیکن ہم نے آئرلینڈ میں ایک ساتھ ٹریننگ کی۔ یہ تو ابھی شروعات ہے، مجھے بہت طویل سفر طے کرنا ہے۔ میں اپنے کوچز کے مشورے سن کر اسے رِنگ میں استعمال کرنے کی کوشش کرتی ہوں۔ اسٹرینڈجا میموریل گولڈ میڈلسٹ نیتو دوسرے باکسرز کی ویڈیوز دیکھنا پسند نہیں کرتی ہیں اور ان کا کوئی رول ماڈل نہیں ہے۔
انہوں نے 2012 میں باکسنگ کا آغاز کیا لیکن 2019 میں کندھے کی انجری کے باعث انہیں طویل عرصے تک کھیل سے باہر ہونا پڑا۔ جس جگہ سے نیتو آئی ہیں وہاں لڑکیوں کو کھیلوں میں حصہ لینے کی ترغیب نہیں دی جاتی لیکن ان کے والد نے قریبی اکیڈمی میں نیتو کا نام لکھوایا۔ اس باکسر کے خواب کو پورا کرنے کے لیے ان کے والد کو چندی گڑھ میں اپنی ملازمت چھوڑنے پر مجبور ہونا پڑا۔ وہ مالی طور پر اچھے مستقبل کے لیے دولت مشترکہ کھیلوں میں سونے کے تمغے کے لیے پر امید ہیں۔
انہوں نے کہا کہ ہم مشترکہ خاندان میں رہتے ہیں۔ میرے والد ہر وقت میرے ساتھ ہوتے ہیں اس لیے وہ کام نہیں کر سکتے۔ بڑے بھائی تمام اخراجات برداشت کرتے ہیں کیونکہ ہم مشترکہ خاندان میں رہتے ہیں۔ امید ہے کہ یہ تمغہ بڑا فرق ڈالے گا۔
