کراچی کے نیشنل اسٹیڈیم میں کھیلے جانے والے ٹی۔20 سیریز کے دوسرے میچ میں لاہور قلندرز نے پشاور زلمی کو 4 وکٹوں سے شکست دے دی۔ قبل ازیں لاہور قلندرز کے کپتان سہیل اختر نے ٹاس جیت کر پہلے فیلڈنگ کرنے کا فیصلہ کیا اور بولرز نے ان کے فیصلے کو درست ثابت کردیا۔
شاہین شاہ آفریدی نے اننگز کی پہلی ہی گیند پر امام الحق کو پویلین کی راہ دکھائی، اس کے بعد سلمان مرزا نے 18 کے مجموعے پر کامران اکمل کو بھی آؤٹ کردیا۔ ایک رن کے اضافے کے بعد سلمان مرزا نے پھر جادو جگایا اور خطرناک حیدر علی کو بھی صفر پر آؤٹ کردیا۔
لیکن شعیب ملک نے 26 رنز کی اننگز کھیل کر ٹیم کو بحران سے نکالا لیکن وہ بھی 46 کے مجموعے پر ہمت ہار گئے۔ روی بوپارا اور ردرفورڈ کے درمیان 64 کی شراکت نے پشاور زلمی کا اسکور 110 تک پہنچایا، جہاں ردرفورڈ آؤٹ ہوگئے، انھوں نے 26 رنز بنائے۔
فاسٹ بولر شاہین شاہ آفریدی لاہور قلندرز کی پی ایس ایل کے کسی سیزن میں پہلے میچ میں کامیابی پر خوش ہیں۔ میڈیا سے گفتگو میں فاسٹ بولر نے اپنی خوشی کا اظہار بھی کیا اور کہا کہ ہم نے پہلی مرتبہ پی ایس ایل میں اپنا افتتاحی میچ جیتا۔
شاہین شاہ آفریدی نے یہ بھی کہا کہ ابتدا میں وکٹیں مل جائیں تو ٹیم حاوی ہوجاتی ہے، کوشش ہے کہ اس پی ایس ایل کا بہترین بولر بنوں۔ انہوں نے مزید کہا کہ لاہور قلندرز کو پچھلے سال کی پرفارمنس سے بہت زیادہ اعتماد ملا ہے، ٹیم کو نیٹ میں کی گئی محنت کا صلہ ملا ہے۔
