کنٹرول لائن کے دونوں اطراف کرکٹ میں عوامی دلچسپی کے مدنظر ٹورنامنٹس کا انعقاد کیا جاتا ہے۔ دلچسپ بات یہ ہے کہ ٹورنامنٹ کا نام بھی ایک جیسا رکھا جاتا ہے۔
دنیا بھر کی طرح ٹی۔20 میچز کا پاکستان کے قبضے میں واقع علاقہ کشمیر میں بھی ٹورنامینٹ کا انعقاد عمل میں لایا جارہا ہے۔ جسے کشمیر پریمئیر لیگ کا نام دیا گیا ہے۔ اس سلسلہ میں رنگا رنگ افتتاحی تقریب منعقد کی گئی۔ پروگروم میں بین الاقوامی شہرت یافتہ معروف گلوکاروں، فلم شخصیتوں، شوبز اور اسپورٹس اسٹارز اور چھوٹے پردے کے فنکاروں نے شرکت کی۔
میڈیا اطلاعات کے مطابق اس رنگا رنگ افتتاحی تقریب کو خاص بنانے کے لیے قابل ذکر مہمان شخصیتوں میں شاہد آفریدی، سوئنگ بالنگ کے سلطان وسیم اکرم، اداکار شان شاہد، فلم اسٹارز مہوش حیات، ایمان علی، فضا علی، جُگن کاظم اور عائشہ عمر بھی ویڈیو کا حصہ ہیں۔
کشمیر پریمیئر لیگ کی پریس ریلیز کی تفصیلات میں بتایا گیا ہے کہ 16 سے 27 مئی تک مظفرآباد میں یہ لیگ کھیلی جائے گی۔ جب کہ کے پی ایل میں مظفر آباد ٹائیگرز، میرپور رائلز، راؤلا کوٹ ہاکس، کوٹلی پینتھرز، باغ اسٹالینز اور اوور سیز واریئرز حصہ لیں گی۔
دلچسپ بات یہ ہے کہ سرینگر میں 12-2011میں فوج کے اسوقت کے کور کمانڈر لیفٹننٹ جنرل عطا حسنین نے کشمیر پریمئیر لیگ کا اہتمام کیا تھا جس میں وادی کشمیر سے وابستہ درجنوں ٹیموں نے حصہ لیا تھا۔ عمر عبداللہ کے دور حکومت میں منعقدہ اس پریمئیر لیگ میں فوج نے یوتھ سروسز اینڈ اسپورٹس محکمے کے اشتراک سے اس ٹورنامنٹ کے کئی ادوار کا اہتمام کیا تھا حالانکہ علیحدگی پسندوں نے کھلاڑیوں کو ان ٹورنامنٹس سے دور رہنے کی ترغیب دی تھی۔ اسکے باوجود بڑے پیمانے پر فوج نے کرکٹ مقابلوں کا انعقاد کیا تھا۔
