آئی پی ایل کا 15 واں میچ چنئی سُپر کنگز اور کولکاتا نائٹ رائیڈرس کے مابین ممبئی کے وانکھیڈے اسٹیڈیم میں کھیل گیا جس میں کولکاتا نائٹ رائیڈرس نے ٹاس جیت کر گیند بازی کا فیصلہ کیا۔ کولکاتا نائٹ رائیڈرز نے آندرے رسل (54) اور پیٹ کمنز (ناٹ آؤٹ) کی شاندار اننگز کے ذریعہ چنئی سپر کنگز کے 220 رنز کے اسکور کو بونا ثابت کرنے کی کوشش کی لیکن چنئی نے آخر میں یہ میچ 18 رنز سے جیت کر دلچسپ فتح حاصل کی۔
چنئی نے فاف ڈو پلیسیس (95 ناٹ آؤٹ) اور انشومان گائیکواڈ (64) کی عمدہ نصف سنچریوں کی مدد سے ممبئی کے وانکھیڑے اسٹیڈیم میں 20 اوور میں تین وکٹ پر 220 رنز بنائے تھے لیکن کولکتہ کی ٹیم نے 19.1 اوورز میں 202 پر سمٹ گئی۔ چنئی کی چار میچوں میں یہ تیسری جیت رہی جبکہ کولکاتہ کو چار میچوں میں تیسری شکست کا سامنا کرنا پڑا۔
واضح رہے کہ کولکاتا نائٹ رائیڈرز چار میچوں میں تین شکست اور ایک جیت کے ساتھ محض دو پوائنٹس لے کر پانچویں مقام پر ہے جبکہ تین بار کی آئی پی ایل فاتح چنئی سُپر کنگز چار میں سے تین میچوں میں شاندار اور بڑی جیت کی بدولت چھ پوائنٹس کے ساتھ نمبر ایک پر ہے۔ اتنا ہی نہیں اس کا نیٹ رن (1.194+) ریٹ بھی سب سے زیادہ ہے۔ اس دوران کے کے آر کے لیے مزید ایک شکست اس کی پلے آف تک پہنچنے کی راہ مشکل کر سکتی ہے۔ ایسے میں اسے اس مقابلے کو کسی بھی حالت میں جیتنا ہوگا۔
کولکاتا نائٹ رائیڈرس کے سلامی بلے باز نتیش رانا کے علاوہ ابھی تک اس ٹیم کا کوئی بھی بلے باز موثر اور میچ وننگ کارکردگی نہیں کر پایا چاہے وہ بھارتی کھلاڑی ہوں یا اوورسیز۔ خاص کر مڈل آرڈر پر سوالیہ نشان کھڑا ہورہا ہے۔ دو میچوں میں نتیش رانا کی جانب سے اچھا آغاز ملنے کے باوجود مڈل آرڈر کا نہ چلنا ہی ٹیم کی شکست کی وجہ بنا تھا اور ان دونوں میچوں میں ٹیم ہدف کا تعاقب نہیں کر پائی تھی جبکہ ایک وقت وہ اچھی پوزیشن میں تھی۔ گزشتہ مقابلے میں رائل چیلنجرز بنگلور نے کولکاتا کو 38 رن سے ہرادیا تھا جبکہ اس سے پہلے والے میچ میں کولکاتا کو ممبئی انڈینز کے ہاتھوں 10 رنوں سے شکست ملی تھی۔ وہیں دوسری جانب چنئی سُپر کنگز اپنے پچھلے دو مقابلے بالترتیب 6 وکٹ اور45 رن سے جیت بہترین فارم میں ہے۔
کولکتہ نائٹ رائیڈرس کی گیند بازی میں وہ دم نظر نہیں آرہا ہے۔ تیز اور اسپن گیند باز دونوں کو ہی وکٹ کے لیے کافی مشقت کرنی پڑرہی ہے۔ درمیان کے اوورز میں وکٹ نہ نکال پانا مخالف ٹیموں کو کولکاتا پر حاوی ہونے میں مدد کر رہا ہے۔بنگلور کے خلاف میچ میں کچھ ایسا ہی ہوا تھا جب گلین میکسویل اور اے بی ڈویلیئرس نے کولکاتا نائٹ رائیڈرس کے گیند بازوں کے چھکے چھڑا دئے تھے۔ دونوں بلے بازوں نے 35 گیندوں پر 53 رن کی اہم شراکت کی تھی۔
