نئی دہلی: ورلڈ ٹیسٹ چیمپئن شپ (ڈبلیو ٹی سی ) کا فائنل 7 سے 11 جون تک انگلینڈ کے اوول گراؤنڈ میں ہندوستان اور آسٹریلیا کے درمیان کھیلا جائے گا۔ روہت شرما اور شبمن گل ڈبلیو ٹی سی فائنل میں اوپننگ جوڑی ہو سکتے ہیں۔ روہت شرما ٹیم کی کپتانی کریں گے۔ انہیں انگلینڈ میں کھیلنے کا تجربہ ہے۔ 2021-22 میں انگلینڈ کے دورے میں، روہت نے 4 ٹیسٹ میں 52.57 کی اوسط سے 368 رنز بنائے۔ اس کے علاوہ روہت نے ڈبلیو ٹی سی-23 سیزن میں 700 سے زیادہ رنز بنائے ہیں۔ شبمن گل نے کے ایل راہل کو سخت چیلنج دیتے ہوئے افتتاحی مقام پر قبضہ کرلیا۔ اپنے ٹیسٹ کیریئر کے ابتدائی مرحلے میں گل نے 15 میچوں میں 2 سنچریوں کی مدد سے 890 رنز بنائے ہیں۔ گل کا انگلینڈ میں تجربہ بہت کم ہے۔ انہوں نے 2 ٹیسٹ میچوں میں 57 رنز بنائے ہیں۔ روہت اور گل نے نیوزی لینڈ کے خلاف 2021 کے ڈبلیو ٹی سی فائنل میں بھی اوپننگ کی۔
چیتشور پجارا نمبر 3 پر نظر آئیں گے۔ چیتشور پجارا کو انگلینڈ میں کھیلنے کا سب سے زیادہ تجربہ ہے۔ وہ انگلینڈ میں کاؤنٹی کرکٹ کھیلنا جاری رکھے ہوئے ہیں۔ اس وجہ سے فائنل میں سب سے زیادہ ذمہ داری ان پر ہوگی۔ اس سیزن میں پجارا نے 16 میچوں میں 887 رنز بنائے ہیں۔ پجارا نے انگلینڈ میں 15 ٹیسٹ میں 829 رنز بنائے ہیں۔ اسٹار بلے باز وراٹ کوہلی پر بھی اہم ذمہ داری ہوگی۔ کوہلی ایک بڑے میچ کے کھلاڑی ہیں اور اب فارم میں واپس آ چکے ہیں۔ کوہلی نے آسٹریلیا کے خلاف ٹیسٹ میں سنچری کی خشک سالی بھی ختم کی۔ اس کے علاوہ آسٹریلیا کے خلاف کوہلی کی کارکردگی ہمیشہ اچھی رہی ہے۔ کوہلی نے آسٹریلیا کے خلاف 24 ٹیسٹ میچوں میں 8 سنچریاں اسکور کی ہیں۔
پانچویں نمبر پر رہانے کی بیٹنگ یقینی ہے۔ رہانے، جو 15 ماہ سے ٹیم سے باہر ہیں، اب شریس ائیر کی جگہ کھیلیں گے۔ رہانے پانچویں نمبر پر شاندار بلے بازی کرتے ہیں۔ رہانے نے پانچویں نمبر پر 66 میچ کھیلے ہیں جس میں ان کے 3555 رنز اور 8 سنچریاں ہیں۔ راہل کو کے ایس بھرت کی جگہ وکٹ کیپنگ کی ذمہ داری بھی مل سکتی ہے۔ راہل، جو عام طور پر اوپننگ کرتے ہیں، اپنے کیریئر میں دوسری بار چھٹے نمبر پر بلے بازی کر سکتے ہیں۔ ڈیڑھ سال کے بعد آسٹریلیا کے خلاف بی جی ٹی سیریز میں ہندوستانی ٹیم نے کے ایس بھرت کو پلیئنگ الیون میں شامل کیا تھا۔ بھرت بلے سے کمال نہیں دکھا سکے۔ انہوں نے 6 میچوں میں مجموعی طور پر 101 رنز بنائے۔
رویندر جڈیجہ ٹیسٹ کرکٹ کے بہترین آل راؤنڈرز میں سے ایک ہیں۔ جڈیجہ فائنل میں ٹیم کا حصہ ہوں گے۔ جڈیجہ بولنگ کے ساتھ ساتھ بیٹنگ میں بھی ماہر ہیں۔ وہ ٹاپ 7 میں بائیں ہاتھ کے واحد بلے باز ہوں گے۔ اسپن بولنگ میں بھی ٹیم میں جدیجہ ہی واحد آپشن ہوں گے۔ شاردول باؤلنگ آل راؤنڈر کے طور پر ٹیم میں شامل ہوں گے۔ وہ اشون کی جگہ ٹیم میں شامل ہوں گے۔ پچھلی بار انگلینڈ کے دورے پر ہندوستانی ٹیم 4 پیسرز کے ساتھ میدان میں اتری تھی اور اب ٹیم دوبارہ وہی فارمولہ اپنانا چاہے گی۔ ٹھاکر کا انگلینڈ میں اچھا ریکارڈ ہے۔ شاردول نے انگلینڈ میں 3 میچوں میں 8 وکٹیں حاصل کی ہیں۔ اس کے علاوہ، شاردل نے صرف انگلینڈ میں اپنے کیریئر کی 3 نصف سنچریوں میں سے 2 بنائی ہیں۔
یہ بھی پڑھیں: WTC Final اجنکیا رہانے ڈبلیو ٹی سی کے فائنل اسکواڈ میں شامل
جسپریت بمراہ کی غیر موجودگی میں محمد شامی بولنگ اٹیک کی قیادت کریں گے۔ شامی ہندوستانی ٹیم کے تجربہ کار گیندبازہیں اور انہیں انگلینڈ میں ٹیسٹ میچ کا کافی تجربہ ہے، انہوں نے 13 ٹیسٹ کھیلے اور 38 وکٹیں حاصل کیں۔ محمد سراج نئی گیند کے ساتھ شامی کے ساتھ باؤلنگ اٹیک کو سنبھالیں گے۔ سراج انگلینڈ میں 5 میچ کھیل چکے ہیں جس میں انہوں نے 18 وکٹیں حاصل کی ہیں۔ بھارت کے پاس جے دیو انادکٹ کی شکل میں لیفٹ آرم پیسر موجود ہے لیکن تجربہ کی کمی کی وجہ سے مینجمنٹ امیش یادیو کو موقع دے سکتی ہے۔ امیش یادو نے ڈبلیو ٹی سی سیزن میں 8 میچوں میں 20 وکٹیں حاصل کی ہیں۔
اکشر پٹیل، کے ایس بھرت، آر اشون اور جے دیو انادکٹ کے ڈبلیو ٹی سی فائنل میں موقع ملنے کے امکانات کم ہیں۔ پچ تیز گیند بازوں کے لئے سازگار ہے جس کی وجہ سے جڈیجا، اکشر یا اشون میں سے صرف ایک کھلاڑی کے کھیلنے کا امکان ہے۔ اوول گراؤنڈ میں ہندوستانی ٹیم نے کل 14 میچ کھیلے ہیں۔ اس میں وہ صرف 2 میچ جیتے ہیں۔ ہندوستانی ٹیم نے اس گراؤنڈ پر اپنا آخری میچ 2021 میں انگلینڈ کے خلاف کھیلا تھا۔ اس میچ میں اسے 157 رنز سے جیت ملی تھی۔اوول گراؤنڈ پر آسٹریلیا کی حالت بھی ٹیم انڈیا جیسی ہے۔ آسٹریلیا نے یہاں کھیلے گئے 38 میچوں میں صرف 7 جیتے ہیں۔
یو این آئی
