حیدرآباد: بھارت اورآسٹریلیا کے درمیان اتوار کو یہاں کھیلے جانے والے ٹی20 کرکٹ میچ کے ٹکٹ کے تعلق سے بھگدڑ میں پولیس نے سابق کپتان اور حیدرآباد کرکٹ ایسوسی ایشن (ایچ سی اے) کے صدر محمد اظہر الدین اور دیگر عہدیداروں کے خلاف تین الگ الگ ایف آئی آر درج کی ہیں۔ Police case registered against Hyderabad Cricket Association for cheating
پولیس نے جمعہ کو بتایا کہ کرکٹ شائقین کی شکایت پر مقامی پولیس نے جمعرات کی رات ایف آئی آر درج کی۔ شائقین کا الزام ہے کہ راجیو گاندھی انٹرنیشنل کرکٹ اسٹیڈیم میں بھارت اور آسٹریلیا کے درمیان اتوار کو کھیلے جانے والے ٹی ٹوئنٹی میچ کے ٹکٹوں کی بلیک مارکیٹنگ کی جا رہی ہے، اور کرکٹ ایسوسی ایشن اس معاملے میں لاپرواہی برت رہی ہے۔
یہ بھی الزام ہے کہ سکندرآباد کے جم خانہ گراؤنڈ میں ٹکٹ فروخت کرنے والے مرکز میں انتہائی ناقص انتظامات کیے گئے تھے جہاں پر انتشار پسند عناصر کا غلبہ تھا۔ قابل ذکر ہے کہ ٹکٹوں کی فروخت کے دوران بھگدڑ جیسی صورتحال پیدا ہوگئی تھی جس میں دو خواتین سمیت چھ افراد زخمی ہوگئے تھے جنہیں اسپتال میں داخل کرایا گیا ہے۔
