ممبئی:ہندوستان میں کھیلے جارہے آئی سی سی منز ورلڈ کپ 2023 کا خمار سر چڑھ کر بولنے لگا ہے۔کھیل کے دیوانوں میں ورلڈ کپ کو لے کر زبردست جوش و خروش پایا جا رہا ہے۔
سرکاری ذرائع نے جمعہ کو بتایا کہ 40 کروڑ سے زیادہ تماشائیوں نے ورلڈ کپ کے پہلے 26 میچز میدان میں یا ٹی وی اور موبائل فون پر دیکھے ہیں۔ ناظرین کی خصوصی توجہ کی وجہ سے 2019 کے ورلڈ کپ کے مقابلے دیکھنے کے کل وقت (182 بلین منٹ) میں 22 فیصد اضافہ ہوا ہے۔
نیوزی لینڈ کے خلاف 22 اکتوبر کو کھیلے گئے میچ میں وراٹ کوہلی کی 95 رنز کی میچ وننگ اننگ دیکھنے کے لیے 80 ملین سے زیادہ ناظرین ٹی وی پر موجود تھے۔ یہ اس ورلڈ کپ کو دیکھنے والوں کی سب سے زیادہ تعداد ہے۔ اس کے بعد ہندوستان بمقابلہ پاکستان میچ کو 75.5 ملین ناظرین نے دیکھا۔
یہ بھی پڑھیں:بھارت ورلڈ کپ کے سیمی فائنل میں، سری لنکا کو 302 رنوں سے شکست
ہندوستان میں شائقین کا زبردست ردعمل آئی سی سی مینز کرکٹ ورلڈ کپ کی بے پناہ مقبولیت اور میدان میں وراٹ کوہلی کی غیر معمولی حصولیابیوں کو لے کربے مثال جوش و خروش کو نمایاں کرتا ہے۔ سچن کا ریکارڈ توڑنے کے لیے کنگ کوہلی کی 49ویں اور 50ویں ون ڈے سنچری کا بے صبری سے انتظار کرنے والے شائقین کا جوش و خروش مزید بڑھنے والا ہے۔
یواین آئی
