ایون لوئس (نوٹ آؤٹ55) اور آیوش بدونی (نوٹ آؤٹ 19) کی زبردست اننگز اور ان کے درمیان 2.1 اوور میں 40 رنز کی زبردست شراکت کی بدولت لکھنؤ سپر جائنٹس نے گزشتہ چیمپین چنئی سپرکنگز کے زبردست اسکور کے باوجود جمعرات کو تین گیند باقی رہتے ہوئے چھ وکٹ سے جیت حاصل کرلی۔چنئی نے رابن اتھپا (50) کے زبردست ہاف سنچری اور شیوم دوبے (49) کی طوفانی اننگ کی بدولت آئی پی ایل 2022 کے ساتویں میچ میں 20 اوور میں سات وکٹ پر 210 رنز کا زبردست اسکور بنایا جبکہ لکھنؤ نے 19.3 اوور میں چار وکٹ پر 211 رنز بناکر آئی پی ایل میں اپنی پہلی جیت حاصل کی جبکہ چنئی کو مسلسل دوسری ہار کا سامنا کرنا پڑا۔
ایک بڑے ہدف کا تعاقب کرتے ہوئے لکھنؤ نے طوفانی شروعات کی۔ کپتان لوکیش راہول اور کوئنٹن ڈی کاک نے پہلی وکٹ کے لیے 99 رنز کی طوفانی شراکت قائم کی۔ راہول نے 26 گیندوں میں دو چوکوں اور تین چھکوں کی مدد سے 40 رنز بنائے۔ ڈی کاک نے 39 گیندوں میں نو چوکوں کی مدد سے 61 رنز کی شاندار نصف سنچری اسکور کی۔ 139 کےا سکور پر ڈی کاک کی وکٹ گری۔ لوئس نے ایک طرف سے چنئی پر حملہ کیا اور اس کے گیند بازوں کا دھواں نکال دیا۔Evin Lewis Propels Lucknow Super Giants To Incredible Win Over Chennai Super Kings
اننگز کے 19ویں اوور میں لوئس اور بدونی نے شیوم دوبے کی گیندوں پر 25 رنز بنا کر میچ کا فیصلہ کیا۔ بدونی نے آخری اوور کی پہلی گیند پر دو بار وائیڈ مارنے کے بعد چھکا لگایا۔ تیسری گیند پر ایک رن لے کر انہوں نے لکھنؤ کیمپ میں خوشی پیدا کردی۔ لوئس نے 23 گیندوں پر ناقابل شکست 55 رنز میں چھ چوکے اور تین چھکے لگائے جبکہ بدونی نے نو گیندوں پر ناقابل شکست 19 رنز میں دو چھکے لگائے۔ لوئس کو پلیئر آف دی میچ کا ایوارڈ دیا گیا۔
اس جیت کے ساتھ ہی لکھنؤ نے آئی پی ایل میں اپنا کھاتہ کھول لیا ہے۔ 200 سے اوپر کے ہدف کا تعاقب اتنا آسان نہیں ہے لیکن لکھنؤ کے بلے بازوں نے اسے آسان بنا دیا۔ پہلے اوپنرز نے رنز بنائے۔ اس کے بعد لوئس اور نوجوان بدونی آئے جنہوں نے آسانی سے ہدف کا تعاقب کیا۔ سی ایس کے نے راہل اور ڈی کوک کو لائف لائن دی، جس کی قیمت انہیں مہنگی پڑی۔
ٹاس ہارنے کے بعد بلے بازی کا انتخاب کرتے ہوئے چنئی کی ٹیم نے شاندار آغاز کی بنیاد پر بڑا اسکور بنایا۔ اتھپا نے پہلی ہی گیند سے لکھنؤ کے گیند بازوں کو آڑے ہاتھوں لیا۔ رتوراج گائیکواڈ تاہم ایک رن پر رن آؤٹ ہوئے۔
28 پر گائیکواڑ کی وکٹ گرنے کے بعد اتھپا نے معین علی کے ساتھ مل کر اننگز کو اسی تال کے ساتھ آگے بڑھایا۔ دونوں بلے بازوں نے دھماکہ خیز انداز میں بیٹنگ کرتے ہوئے دوسری وکٹ کے لیے 56 رنز کی شراکت قائم کی۔ تاہم، آٹھویں اوور میں، اتھپا روی بشنوئی کی گیند پر بڑا شاٹ مارنے پر لیگ بیفور سے آؤٹ ہو گئے۔ 84 کےا سکور پر دوسری وکٹ گرنے کے بعد معین نے ذمہ داری سنبھالی۔ اسی دوران شیوم دوبے نے بھی دوسرے سرے سے جارحانہ رویہ دکھایا اور تیزی سے رنز بنائے۔
چنئی کا تیسرا وکٹ 106 کے اسکور پر معین کی شکل میں گرا۔ اس کے بعد دوبے نے امباتی رائیڈو کے ساتھ برتری حاصل کی۔ دونوں نے چوتھی وکٹ کے لیے 60 رنز کی اہم شراکت داری کی۔ رائیڈو کے 166 رنز پر آؤٹ ہونے کے بعد دوبے بھی 189 پر اپنا وکٹ گنوا بیٹھے۔ انہوں نے 30 گیندوں میں پانچ چوکوں اور دو چھکوں کی مدد سے 49 رنز بنائے اور نصف سنچری سے محروم رہے۔ پھر آخر میں کپتان رویندرا جڈیجہ اور دھونی نے مختصر مگر طوفانی اننگز کی بنیاد پر ٹیم کو 210 کے اسکور تک پہنچا دیا۔
مزید پڑھیں:Punjab Kings Beat RCB by Five Wickets: پنجاب نے شاندار بلے بازی سے رائل چیلنجرز بنگلور کو شکست دی
اتھپا نے 27 گیندوں پر آٹھ چوکوں اور ایک چھکے کی مدد سے 50، معین نے 22 گیندوں پر چار چوکوں اور دو چھکوں کی مدد سے 35 رنز بنائے، رائیڈو نے 20 گیندوں پر دو چوکوں اور دو چھکوں کی مدد سے 27 رنز بنائے، جڈیجہ نے تین چوکوں کی مدد سے نو رنز بنائے۔ دھونی نے چھ گیندوں میں دو چوکوں اور ایک چھکے کی مدد سے 16 رنز کی طوفانی اننگز کھیلی۔ دھونی نے اپنی پہلی گیند پر چھکا اور آخری گیند پر چوکا لگایا۔
لکھنؤ کی جانب سے روی بشنوئی، اویس خان اور اینڈریو ٹائی نے دو دو وکٹیں حاصل کیں۔
یواین آئی
