چنئی کے ایم اے چدمبرم اسٹیڈیم میں کھیلے گئے میچ میں دوبار کی چمپیئن کلکتہ نائٹ رائیڈرس کا پلہ بھاری رہا اور اسے دس رنز سے کامیابی حاصل ہوئی۔ میچ میں نتیش رانا اور راہل ترپاٹھی نے جارحانہ اننگ کھیلی اور دنیش کارتک کے طوفانی 22 رنز کی بدولت میچ میں حیدرآباد کے لیے 188 رنز کا ہدف رکھا۔
لیکن دوسری جانب حیدرآباد سن رائزرس کے بلے باز 188 کے ہدف کو عبور نہیں کرسکے۔ منیش پانڈے اور جانی بیرسٹو ہی ایسے بلے باز رہے جنہوں نے بالترتیب 61 اور 55 رنز بناکر ٹیم کو کامیابی دلانے کی کوشش کی۔ اخیر میں عبدالصمد کی جانب سے صرف 8 بالس پر بنائے گئے 19 رنز بھی بیکار گئے، اس طرح کولکتہ نے حیدرآباد کو 10 رن سے شکست دے دی۔
قبل ازیں ٹاس جیت کر حیدرآباد نے فیلڈنگ کا فیصلہ کیا اور کلکتہ کو بلے بازی کی دعوت دی۔ سلامی بلے باز نتیش رانا (80) اور راہل ترپاٹھی (53) کی شاندار نصف سنچریوں کی بدولت کولکتہ نائٹ رائڈرس نے سن رائزرس حیدرآباد کے خلاف اتوار کے روز آئی پی ایل 14 کے تیسرے مقابلہ کو یک طرفہ انداز میں 10 رن سے جیت لیا۔
کولکتہ نے 20 اوور میں پانچ وکٹ پر 187 رنز کا چیلنجنگ اسکور بنایا، جب کہ حیدرآباد کی ٹیم 20 اوور میں پانچ وکٹوں پر 177 رنز ہی بنا سکی۔ حیدرآباد کی طرف سے منیش پانڈے نے ناٹ آوٹ 61 اور جانی بیرسٹو نے 55 رنز بنائے۔ سلامی بلے باز نتیش رانا کو پلیئر آف دی میچ کا ایوارڈ دیا گیا۔
