راجستھان رائلز نے ٹاس جیت کر کولکاتا نائٹ رائیڈرز کو بلے بازی کی دعوت دی تھی لیکن اس کی شروعات اچھی نہیں رہی پہلے ہی اوور میں اس نے نتیش رانا کا وکٹ گنوادیا تھا لیکن اس کے بعد شبھمان گل اور راہل تریپاٹھی نے دوسر وکٹ کے لیے 72 رنز کی پارٹنرشپ کرکے ٹیم کا اسکور مضبوط کیا۔
شبھمان گل نے 36 جبکہ راہل تریپاٹھی نے 39 رنز کی اننگ کھیلی، ان دونوں کو بالترتیب راہل تیواتیا اور شریس گوپال نے آؤٹ کیا۔ اس کے بعد سنیل نارائن بھی صفر رن پر پویلین لوٹ گئے جبکہ جارحانہ بلے بازی کے چکر میں آندر رسل بھی 25 رنز بنا کر آؤٹ ہوگئے تاہم انہوں نے کچھ بڑے شاٹس کھیلے۔
دوسری جانب کپتان ایون مورگن نے اننگ کو سنبھالا اور کپتانی اننگ کھیلی۔ مورگن نے 35 گیندوں میں 5 چوکوں اور 6 چھکوں کی مدد سے 68 رنز بنائے اور ٹیم کو باعزت اسکور تک پہنچایا۔
راجستھان رائلز کی جانب سے راہل تیواتیا سب سے کامیاب گیند باز رہے اور تین بلے بازوں کو پویلین کی راہ دکھائی جبکہ کارتک تیاگی نے 2، جوفرا آرچر اور شریس گوپال نے ایک ایک وکٹ حاصل کئے۔
