ٹاس جیت کر بلے بازی کرنے اتری سن رائیزرس حیدر آباد کی شروعات شاندار رہی اور سلامی بلے باز ڈیوڈ وارنر اور جانی بیریسٹو نے پہلے وکٹ کے لیے 15 اوورز میں 160 رنز کی بڑی پارٹنرشپ کی۔
ان دونوں بلے بازوں نے میدان کے چاروں جانب شاٹس لگائے اور اس سیزن کی اب تک کی سب سے بڑی اوپننگ پارٹنرشپ کی۔
ڈیوڈ وارنر 40 گیندوں میں 52 رنز بناکر آؤٹ ہوئے انہوں نے 5 چوکے اور ایک چھکہ لگایا اور روی بشنوئی کی گیند پر بڑا شاٹ لگانے کے چکر میں میکسویل کو کیچ تھما بیٹھے۔
وارنر کے آؤٹ ہونے کے بعد حیدر آباد کے رنوں کی رفتار سست پڑ گئی اور کوئی بھی بلے باز کریز پر نہیں ٹک سکا۔
عبدالصمد(8 رنز)، منیش پانڈے(ایک رن)،پریم گرگ(صفر) اور ابھیشیک شرما(12 رنز) پر پویلین لوٹ گئے۔ کین ولیمسن نے تھوڑی مزاحمت کی اور 10 گیندوں میں 20 رنز بنائے۔
حالانکہ دوسری جانب سے جانی بیریسٹو اکیلے مزاحمت کرتے ہوئے نظر آئے لیکن بدقسمتی سے اپنی سنچری مکمل نہیں کرسکے اور 97 رنز کے ذاتی اسکور پر روی بشنوئی کی گیند پر ایل بی ڈبلیو ہوگئے۔
بیریسٹو نے 55 گیندوں میں 7 چوکوں اور 6 فلک بوس چھکوں کی مدد سے 97 رنز بنائے۔
پنجاب کی جانب سے روی بشنوئی سب سے کامیاب گیند باز رہے اور تین بلے بازوں کی پویلین کی راہ دکھائی جبکہ ارشدیپ سنگھ نے 2 اور محمد سمیع نے ایک وکٹ حاصل کیا۔
