کراچی پاکستان کے نیشنل اسٹیڈیم میں پاکستان اور جنوبی افریقہ کے درمیان کھیلے جارہے پہلے ٹیسٹ کا آج دوسرا دن ہے۔ بدھ کے روز صبح کھیل کی شروعات میں پاکستان کی جانب سے اظہر علی اور فواد عالم نے گزشتہ روز کی پارٹنرشپ کو آگے بڑھانے کا آغاز کیا۔ دونوں بلے باز ٹیم کو مشکل حالات سے نکالنے کی بھرپور کوشش کررہے ہیں۔
نیشنل اسٹیڈیم میں جاری پہلے سیشن میں کچھ دیر قبل تک پاکستانی ٹیم نے 100 رنز مکمل کیے تھے۔ اظہر علی نے 39 جبکہ فواد عالم نے 37 رنز بنائے ہیں۔ واضح رہے کہ کھیل کے ابتدائی دن پاکستان کے ابتدائی بلے بازوں نے بولرز کی محنت پر اس وقت پانی پھیر دیا جب 27 رنز پر ہی اس کے چار اہم بلے باز آؤٹ ہو گئے۔
پاکستانی بولرز کی نپی تلی اچھی گیندبازی کے سبب جنوبی افریقہ کی ٹیم اپنی پہلی اننگز میں 220 رنز ہی بناسکی تھی۔ پروٹیز کی جانب سے اوپنر ڈین الگر نے سب سے زیادہ 58 رنز بنائے تھے۔ جب کہ پاکستان کی جانب سے لیگ اسپنر یاسر شاہ نے تین وکٹیں حاصل کی تھی۔
