انگلینڈ کی کرکٹ ٹیم بھارت کے دو ماہ طویل دورے پر ہے، جہاں وہ چننئی کے ایم چدمبرم اسٹیڈیم میں دوسرا ٹیسٹ میچ کھیل رہی ہے۔ بھارت نے میچ کی شروعات میں ٹاس جیت کر بلے بازی کا فیصلہ کیا اور اس کی پہلی وکٹ شوبھمن گِل کی صورت میں اس وقت صفر پر ہی گرگئی جب کہ دوسرا اوور ہی پھینکا جارہا تھا۔ بعد ازاں روہت شرما اور پجارا کے درمیان 85 رنز کی رفاقت ہوئی۔ 85 کے اسکور پر پجارا 21 رنز بناکر آؤٹ ہوگئے۔ تاہم بھارت کو بڑا جھٹکا اس وقت لگا جب کپتان کوہلی ٹیم کے ایک رن کے اضافہ کے ساتھ صفر ہی آؤٹ ہوگئے انہیں معین علی نے بولڈ کردیا۔
پہلے سیشن میں لنچ کے وقفہ تک بھارت نے تین وکٹس پر 106 رنز بنالیے ہیں جب کہ روہت شرما 80 رنز کی تیز رفتار اننگ کھیلتے ہوئے کریز پر اب بھی موجود ہیں۔
آج کے میچ کی خاص بات جہاں ایک جانب انگلینڈ کی ٹیم میں چار تبدیلیاں کی گئیں ہیں۔ جیمس اینڈرسن کو آرام دیا گیا ہے اور ان کی جگہ اسٹیورٹ براڈ نے لی ہے۔ اس کے علاوہ معین علی اور بین فاکس کو بھی ٹیم میں جگہ ملی ہے۔ اولی اسٹون کو بھی جوفرا آرچر کے زخمی ہونے کی وجہ سے کھیلنے کا موقع ملا ہے۔
وہیں دوسری جانب بھارتی ٹیم میں بھی تین تبدیلیاں عمل میں لائی گئی ہیں۔ کلدیپ یادو، اکشر پٹیل اور محمد سراج کو واشنگٹن سندر، جسپریت بمراہ اور شہباز ندیم کی جگہ ٹیم میں شامل کیا گیا ہے۔
ٹیمیں اس طرح ہیں۔
بھارتی ٹیم:۔ روہت شرما ، شوبھمن گل ، چیتیشور پجارا ، وراٹ کوہلی (کپتان) ، اجنکیا رہانے ، رشبھ پنت (وکٹ کیپر) ، اکشر پٹیل ، روی چندرن اشون ، کلدیپ یادو ، ایشانت شرما ، محمد سراج۔
انگلینڈ ٹیم:۔ روری برنز، ڈومینک سبلی ، ڈینیل لارنس ، جو روٹ (کپتان) ، بین اسٹوکس ، اولی پوپ ، بین فاکس (وکٹ کیپر) ، معین علی ، اسٹوارٹ براڈ ، جیک لیچ ، اولی اسٹون۔
