پہلے بلے بازی کرتے ہوئے نیوزی لینڈ کی ٹیم بنگلہ دیش کی شاندار بولنگ کے سامنے پوری طرح بے بس نظر آئی اور 16.5 اوورز میں صرف 60 رنز ہی بنا سکی۔ جواب میں بنگلہ دیش نے 15 اوورز میں تین وکٹوں کے نقصان پر 62 رنز بنائے اور میچ سات وکٹوں سے جیت لیا۔
بنگلہ دیش کی جانب سے تجربہ کار تیز گیندباز مستفیض الرحمٰن نے 2.5 اوورز میں 13 رنز دے کر سب سے زیادہ تین، نسم احمد، ثاقب الحسن اور محمد سیف الدین نے دو دو اور مہدی حسن نے ایک وکٹ لیا۔ میزبان ٹیم کی بلے بازی بھی اچھی رہی۔ ٹیم کے سب سے تجربہ کار بلے باز ثاقب الحسن نے سب سے زیادہ 25 رنز بنائے۔ ان کے آؤٹ ہونے کے بعد وکٹ کیپر بلے باز مشفق الرحیم اور کپتان محمود اللہ نے ٹیم کو فتح کی دہلیز تک پہنچا دیا۔ دونوں نے بالترتیب 16 اور 14 رنز کی ناقابل شکست اننگز کھیلی۔ ثاقب کو بلے اور گیند دونوں کے ساتھ عمدہ کارکردگی کے لئے پلیئر آف دی میچ قرار دیا گیا۔
یہ بھی پڑھیں:رنجی ٹرافی کا آغاز 13 جنوری سے ہوگا
بلے بازی میں فلاپ ہونے کے بعد نیوزی لینڈ کی گیند بازی بھی کمزور نظر آئی۔ بلے بازی میں جہاں کپتان ٹام لیتھم اور مڈل آرڈر بیٹسمین ہنری نکولس نے سب سے زیادہ 18 رنز بنائے، وہیں گیندبازی میں اعجاز پٹیل، کول میک کونچی اور رچن رویندرا کو ایک ایک وکٹ ملا۔ ان کھلاڑیوں کے علاوہ کوئی دوسرا کھلاڑی متاثر کن نہیں رہا۔
اس جیت کے ساتھ ہی بنگلہ دیش نے پانچ میچوں کی سیریز میں 0-1 کی برتری حاصل کرلی ہے۔ سیریز کا دوسرا میچ جمعہ کو شیر بنگلہ نیشنل اسٹیڈیم میں ہی کھیلا جائے گا۔
یو این آئی
