ساؤتھپمٹن میں نیوزی لینڈ اور بھارت کے مابین ورلڈ ٹیسٹ چمپیئن شپ کے فائنل کے پانچویں روز نیوزی لینڈ کے کھلاڑیوں پر نازیبا تبصرہ کرنے والے دو شائقین کو میدان سے باہر کردیا گیا۔
آئی سی سی نے ایک بیان میں کہا "ہمیں یہ رپورٹ موصول ہوئی ہے کہ نیوزی لینڈ کے کھلاڑیوں پر نازیبا تبصرہ کیا گیا ہے، جس کی وجہ سے ہماری سکیورٹی ٹیم نے ان شائقین کی شناخت کرکے انہیں میدان سے باہر کردیا ہے۔"
آئی سی سی کے بیان میں کہا گیا "ہم کرکٹ میں کسی بھی قسم کے غیر ذمہ دارانہ اور شرمناک سلوک کو قبول نہیں کریں گے۔"
ذرائع کے مطابق اسٹیڈیم کے بلاک ایم میں بیٹھے دو شائقین نے نازیبا تبصرہ کیا جس کے بعد اسٹیڈیم میں موجود سکیورٹی اہلکار فوری طور پر فعال ہوگئے۔ کچھ مداحوں نے اسے سوشل میڈیا پر شیئر کیا ہے جس کے بعد آئی سی سی نے کارروائی کی۔"
مزید پڑھیں: ڈبلیو ٹی سی فائنل جیسا اہم میچ انگلینڈ میں نہیں ہونا چاہیے: کیون پیٹرسن
بتایا جارہا ہے کہ کیوی کھلاڑی راس ٹیلر پر نازیبا تبصرہ کیا گیا۔ تاہم نیوزی لینڈ کے فاسٹ بالر ٹم ساؤتھی نے کہا ہے کہ کوئی کیوی کھلاڑی اس سے واقف نہیں ہے۔
انہوں نے ورچوئل پریس کانفرنس میں کہا "میں یہ پہلی بار سن رہا ہوں۔ میدان میں میچ کھیل اسپرٹ کو برقرار رکھتے ہوئے کھیلا جاتا ہے۔ میدان سے باہر کیا ہوتا ہے اس سے ہم آگاہ نہیں ہیں۔
واضح رہے کہ اس سے قبل جنوری میں بھارتی فاسٹ بالر محمد سراج پر نسلی تبصرے کرنے پر شائقین کو سڈنی کرکٹ گراؤنڈ سے باہر کر دیا گیا تھا۔
