تریواننت پورم: بھارت اور آسٹریلیا کے درمیان پانچ میچوں کی سیریز کا دوسرا میچ میں کیرلا کے گرین فیلڈ انٹرنیشنل اسٹیڈیم میں کھیلا گیا ہے۔ آسٹریلیا کے کپتان میتھیو ویڈ نے میچ میں ٹاس جیت کر پہلے فیلڈنگ کا فیصلہ کیا اور بھارت نے پہلے بلے بازی کی۔ سلامی بلے باز یشسوی جیسوال 53 رن، رتوراج گائیکواڑ 58 رن اور پھر ایشان کشن کی 52 رنوں کی نصف سنچریوں اور رنکو کی 9 گیندوں میں 31 رن کی شاندار اننگ کی بدولت بھارت نے آسٹریلیا کو جیت کے لیے 236 رنوں کا ہدف دیا ہے۔
بڑے ہدف کا تعاقب کرتے ہوئے آسٹریلیا کی ٹیم مقررہ 20 اوورز میں 9 وکٹ کھو کر 191 رنز ہی بنا سکی۔ جس کی وجہ سے اسے بھارت کے ہاتھوں 44 رنز سے شکست کا سامنا کرنا پڑا۔ اس جیت کے ساتھ بھارت پانچ میچوں کی ٹی ٹوئنٹی سیریز میں دو صفر سے سبقت حاصل کرچکا ہے۔ آسٹریلیا کی طرف سے صرف مارکس اسٹونس 45 رنز، ٹم ڈیوڈ 37 رنز اور اخیر میں کپتان میتھیو ویڈ 42 رنز کی نمایاں اننگز کھیل سکے۔ ان کے علاوہ کسی بھی آسٹریلیائی بلے باز نے شاندار کا کارکردگی کا مظاہرہ نہیں کیا۔ جس کی وجہ سے انھیں مسلسل دوسری شکست کا سامنا کرنا پڑا۔ بھارت کی جانب سے روی بشنوئی اور پرسدھ کرشنا کو تین تین وکٹ ملے جب کہ ارشدیپ، مکیش کمار اور اکسر کو ایک ایک وکٹ ملا۔
پہلے بلے بازی کے لیے آنے والی بھارت کی اوپننگ جوڑی نے پہلے وکٹ کے لیے 5.5 اوور میں 77 رنز جوڑ کر ٹیم کو مضبوط آغاز فراہم کیا۔ ایلس نے یشسوی جیسوال 53 کو زمپا کے ہاتھوں کیچ کروا کر پویلین بھیج کر بھارت کو پہلا جھٹکا دیا۔ جیسوال نے 25 گیندوں میں نو چوکوں اور دو چھکوں کی مدد سے 53 رنز بنائے۔ اس کے بعد بیٹنگ کے لیے آئے ایشان کشن نے جارحانہ انداز اختیار کرتے ہوئے 32 گیندوں میں تین چوکوں اور چار چھکوں کی مدد سے 52 رنز بنا ڈالے۔
اسٹوئنس نے انہیں ایلس کے ہاتھوں کیچ آؤٹ کرایا۔ اس کے بعد بلے بازی کرنے آئے کپتان سوریہ کمار یادو نے 10 گیندوں میں دو چھکوں کی مدد سے 19 رنز بنائے۔ وہ ایلس کی گیند پر اسٹوئنس کے ہاتھوں کیچ آؤٹ ہوئے۔ 20ویں اوور کی دوسری گیند پر روتوراج گائیکواڈ (58) چوتھے وکٹ کی شکل میں آؤٹ ہوئے۔ انہوں نے اپنی اننگ میں تین چوکے اور دو چھکے لگائے۔ رنکو سنگھ نو گیندوں میں 31 رنز بنانے کے بعد ناٹ آؤٹ رہے۔ انہوں نے اپنی دھماکہ خیز اننگ میں چار چوکے اور دو چھکے لگائے۔ تلک ورما سات رنز بناکر ناٹ آؤٹ رہے۔ جس کی وجہ سے بھارت نے ٹی-20 میچ کے مقررہ 20 اوور میں 235 رنز کا تاریخی اسکور بنانے میں کامیاب رہا۔ آسٹریلیا کی جانب سے نیتھن ایلس نے تین وکٹیں حاصل کیں۔ جبکہ مارکس اسٹوئنیس نے ایک بلے باز کو آؤٹ کیا۔
یہ بھی پڑھیں
پہلے میچ میں بھارتی ٹیم نے آسٹریلیا کو دو وکٹ سے شکست دے دی تھی، اس میچ میں آسٹریلیا نے 209 رنز کا ہدف دیا تھا جس کو بھارتی ٹیم نے آخری گیند پر حاصل کر لیا تھا اور یہ ٹی ٹوئنٹی میں بھارت کا سب سے زیادہ رنز کا کامیاب تعاقب تھا۔ واضح رہے کہ بھارت اور آسٹریلیا اب تک 27 ٹی ٹوئنٹی میچ کھیل چکے ہیں۔ جس میں بھارت نے 16 میچ جیتے ہیں جبکہ آسٹریلیا کی ٹیم 10 بار فاتح رہی ہے۔ دونوں ٹیموں کے درمیان ایک میچ ٹائی ہوا ہے۔
بھارت کی پلیئنگ الیون: یشسوی جیسوال، رتوراج گائیکواڑ، ایشان کشن (وکٹ کیپر)، سوریہ کمار یادو (کپتان)، تلک ورما، رنکو سنگھ، اکسر پٹیل، روی بشنوئی، ارشدیپ سنگھ، مکیش کمار، پرسدھ کرشنا
آسٹریلیا کی پلیئنگ الیون: اسٹیون اسمتھ، میتھیو شارٹ، جوش انگلیس، مارکس اسٹونیس، ٹم ڈیوڈ، گلین میکسویل، میتھیو ویڈ (وکٹ کیپر/کپتان)، شان ایبٹ، نیتھن ایلس، ایڈم زمپا، تنویر سنگھا
