احمد آباد: بھارت اور آسٹریلیا کے درمیان احمد آباد کے نریندر مودی کرکٹ اسٹیڈیم میں چوتھا اور آخری ٹیسٹ میچ کھیلا جا رہا ہے۔ آسٹریلوی ٹیم نے ٹاس جیت کر پہلے بیٹنگ کا فیصلہ کیا۔ آسٹریلوی ٹیم نے ٹیسٹ کے پہلے دن بھارت کے خلاف سلامی بلے باز عثمان خواجہ کی پہلی سنچری کی بنیاد پر مضبوط آغاز کیا ہے۔ پہلے دن آسٹریلیا کا سکور 4 وکٹوں پر 255 رنز ہے۔ خواجہ 251 گیندوں پر 104 رنز بنانے کے بعد ناقابل شکست رہے، جبکہ کیمرون گرین بھی 49 رنز بنانے کے بعد ناقابل شکست لوٹے۔ آسٹریلیا کے اوپنر عثمان خواجہ نے بھارت کے خلاف احمد آباد ٹیسٹ کی پہلی اننگز میں شاندار سنچری اسکور کی۔ سولہ سال کے بعد کسی پاکستانی نے ہندوستان کی سر زمین پر سنچری اسکور کی ہے۔ خبروں کے مطابق سولہ برس بعد ٹیسٹ کرکٹ میں مصباح الحق کے بعد عثمان خواجہ ایسے بلے باز ہیں جو بھارتی میدان میں بھارت کے خلاف سنچری اسکور کرنے میں کامیاب ہوئے۔ بتا دیں کہ عثمان خواجہ پاکستان میں پیدا ہوئے لیکن وہ آسٹریلیا کے لئے کرکٹ کھیلتے ہیں۔
بھارت کے خلاف چوتھے ٹیسٹ میچ میں عثمان خواجہ نے 246 گیندوں میں سنچری مکمل کی۔ انہوں نے اپنی اننگز میں 15 چوکے لگائے۔ خواجہ نے ٹریوس ہیڈ کے ساتھ اننگز کا آغاز کیا۔ انہوں نے ہیڈ کے ساتھ پہلی وکٹ کے لیے 94 گیندوں میں 61 رنز کی شراکت داری کی۔ اس کے بعد انہوں نے اسٹیو اسمتھ کے ساتھ نصف سنچری کی اننگز بھی کھیلی۔ اسمتھ اور خواجہ نے تیسری وکٹ کے لیے 248 گیندوں پر 79 رنز کی شراکت داری کی۔ اسمتھ کے آؤٹ ہونے کے بعد خواجہ اور ہینڈزکومب نے 19 رنز کی شراکت قائم کی۔ اس کے بعد کیمرون گرین اور خواجہ کے درمیان 80 رنز کی ناقابل شکست شراکت ہوئی۔
مزید پڑھیں:
