نئی دہلی: پاکستان کرکٹ بورڈ نے جمعرات کو اشارہ دیا ہے کہ اگر پاکستانی ٹیم جاری ورلڈ کپ میں ناکام رہی تو بابر اعظم کو کپتانی سے ہاتھ دھونا پڑ سکتا ہے۔ ورلڈ کپ میں برقرار رہنے کے لیے پاکستان کو جمعہ کو چنئی میں جنوبی افریقہ کو کسی بھی قیمت پر شکست دینا ہوگی لیکن اگر پاکستان یہ میچ بھی ہار جاتا ہے تو اس کی سیمی فائنل میں داخلے کی تمام امیدیں ختم ہو جائیں گی۔
پی سی بی نے ایک بیان میں کہا کہ جہاں تک کپتان بابر اعظم اور ٹیم مینجمنٹ پر میڈیا کی تنقید کا تعلق ہے تو ہم سابق کرکٹرز سے متفق ہیں کہ کامیابی اور ناکامی کھیل کا حصہ ہے۔ پی سی بی نے یہ بھی کہا کہ آئی سی سی ورلڈ کپ 2023 میں ٹیم کی تیاری کے لیے کپتان بابر اعظم اور چیف سلیکٹر انضمام الحق کو مکمل آزادی دی گئی۔ لیکن ورلڈ کپ میں ٹیم کی کارکردگی کو دیکھتے ہوئے بورڈ مزید فیصلے کرے گا جو پاکستان کرکٹ کے مفاد میں ہوں گے۔ اس وقت پی سی بی شائقین، سابق کھلاڑیوں اور متعلقہ فریقوں سے ٹیم کے ساتھ کھڑے ہونے کی اپیل کرتا ہے۔
یہ بھی پڑھیں:
واضح رہے کہ مسلسل تین شکست کا سامنا کرنے کے بعد پاکستان کے پانچ میچوں میں چار پوائنٹس ہیں اور وہ اس وقت پوائنٹس ٹیبل میں چھٹے نمبر پر ہے۔ افغانستان کے خلاف آٹھ وکٹوں کی شکست کے بعد بابر اعظم کو کپتانی سے ہٹانے کا مطالبہ زور پکڑتا جا رہا ہے۔ میڈیا ذرائع کے مطابق بابر کی کپتانی تب ہی بچ سکے گی جب پاکستان باقی تمام میچز جیت کر ورلڈ کپ کے سیمی فائنل میں جگہ بنانے میں کامیاب ہو جائے، اس کے باوجود انہیں صرف ٹیسٹ کپتان ہی رکھا جا سکتا ہے۔
