دبئی: بین الاقوامی کرکٹ کونسل (آئی سی سی) نے 7 جون سے منعقد ہونے والے ورلڈ ٹیسٹ چیمپئن شپ (ڈبلیو ٹی سی) فائنل سے قبل کرکٹ قوانین میں اہم تبدیلی کرتے ہوئے 'سافٹ سگنل' اصول کو ختم کر دیا ہے۔ آئی سی سی نے پیر کے روز جاری کردہ ایک ریلیز میں کہا کہ یہ فیصلہ مردوں کی کرکٹ کمیٹی اور سورو گانگولی کی سربراہی میں خواتین کی کرکٹ کمیٹی کی سفارشات کے بعد کیا گیا ہے۔ سافٹ سگنل کے اصول کے مطابق فیلڈ امپائر تھرڈ امپائر کی مدد لینے سے پہلے مشتبہ کیچ پر اپنا فیصلہ منتقل کرتے ہیں۔ اگر تھرڈ امپائر فوٹیج دیکھنے کے بعد بھی کسی واضح فیصلے پر نہیں پہنچ پاتا تو وہ ’سافٹ سگنل‘ کے حق میں فیصلہ دیتا ہے۔ اصول میں تبدیلی کے بعد آن فیلڈ امپائرز سافٹ سگنل نہیں دے سکیں گے۔ آئی سی سی نے کہا، "آن فیلڈ امپائر کوئی بھی فیصلہ کرنے سے پہلے ٹی وی امپائر سے مشورہ کریں گے۔"
گانگولی نے کہا، “گزشتہ دو برسوں میں ہونے والی کرکٹ کمیٹی کی میٹنگوں میں سافٹ سگنل پر بھی بات چیت ہوئی ہے۔ کمیٹی نے اس پر سنجیدگی سے غور کیا اور یہ نتیجہ اخذ کیا کہ سافٹ سگنل غیر ضروری ہیں۔ وہ بعض اوقات گمراہ کن تھے کیونکہ ری پلے میں کیچ کو واضح طور پر صحیح نہیں ٹھہرایا جا سکتا تھا۔
دریں اثنا، آئی سی سی نے کھلاڑیوں کے لیے زیادہ خطرہ والے علاقوں میں ہیلمٹ پہننا لازمی قرار دے دیا۔ نئے قوانین کے مطابق اگر کسی کھلاڑی کو فاسٹ باؤلر کا سامنا ہو تو اس کے لیے ہیلمٹ پہننا لازمی ہے۔ اس کے علاوہ اگر وکٹ کیپر اسٹمپ کے قریب کھڑا ہے یا کوئی فیلڈر بلے باز کے بالکل قریب کھڑا ہے تو اس کے لیے ہیلمٹ پہننا لازمی ہے۔ گانگولی نے کہا "ہم نے کھلاڑیوں کی حفاظت پر بھی بات کی، جو ہمارے لیے بہت اہم ہے۔ کمیٹی نے فیصلہ کیا کہ کھلاڑیوں کی حفاظت کو یقینی بنانے کے لیے بعض حالات میں ہیلمٹ کے استعمال کو لازمی قرار دینا بہتر ہے۔
آئی سی سی نے فری ہٹ کے اصول میں بھی ایک معمولی تبدیلی کی ہے، جس میں کہا گیا ہے کہ اگر گیند فری ہٹ پر اسٹمپ سے ٹکراتی ہے تو رننگ کے ذریعے لیے گئے رن بلے باز کے اسکور میں جوڑے جائیں گے۔ یہ تبدیلیاں یکم جون 2023 کو انگلینڈ اور آئرلینڈ کے درمیان لارڈز ٹیسٹ سے نافذ العمل ہوں گی۔ ہندوستان اور آسٹریلیا کے درمیان 7 جون کو لندن کے اوول گراؤنڈ میں شروع ہونے والا اگلا ڈبلیو ٹی سی فائنل ان نئے قوانین کے تحت کھیلا جائے گا۔
مزید پڑھیں:
یو این آئی
