گجرات کے شہر احمد آباد میں کھیلے جانے والے ڈے نائٹ ٹیسٹ میچ کے لیے تیاریاں تقریباً مکمل ہوگئی ہیں۔ چونکہ یہ مقابلہ دن رات کا ہوگا اس لیے اس میچ میں گلابی گیند کا استعمال کیا جائے گا۔ اس ضمن میں انگلش بالر مارک ووڈ نے کہا کہ ان کی ٹیم اس ٹیسٹ میچ کے لیے بہت پُرجوش ہے۔ ٹیسٹ سیریز کے تیسرے میچ میں بھارت اور انگلینڈ کی ٹیمیں دنیا کے سب سے بڑے اسٹیڈیم میں کھیلیں گی۔ پہلی بار ایک بین الاقوامی میچ احمد آباد کے موتیرا اسٹیڈیم میں کھیلا جانا ہے۔
جس میں ناظرین کے بیٹھنے کی گنجائش 1 لاکھ 10 ہزار ہے۔ سیریز میں بھارت اور انگلینڈ کی ٹیمیں 1-1 سے برابر ہیں۔ واضح رہے کہ بھارت کو آئی سی سی ٹیسٹ چمپیئن شپ کے فائنل میں پہونچنے کے لئے سیریز کو دو میچوں کے فرق سے جیتنا ہے۔
واضح رہے کہ کولکاتہ میں بنگلہ دیش کے خلاف بھارت نے پہلا ڈے نائٹ ٹیسٹ میچ کھیلاتھا۔ یہ میچ بھارت نے صرف تین دن میں ایک اننگز اور 46 رنز سے جیتا تھا۔ اس میچ میں فاسٹ بولرزنے تمام 20 وکٹیں حاصل کیں۔ ایشانت نے دونوں اننگز میں مجموعی طور پر 9 وکٹیں حاصل کی تھی جب کہ امیش یادو نے 7 وکٹیں حاصل کی تھی۔ یہ انگلینڈ کے خلاف کھیلا جانے والا بھارت میں دوسرا پِنک بال ٹیسٹ ہوگا۔
