ایڈیلیڈ: نیشنل کرکٹ اکیڈمی (این سی اے) کے سربراہ وی وی ایس لکشمن نیوزی لینڈ کے لیے بھارتی ٹیم کے قائم مقام ہیڈ کوچ ہوں گے، کیونکہ ٹی ٹوئنٹی ورلڈ کپ 2022 کے بعد بی سی سی آئی نے راہل دراوڈ کی زیرقیادت کوچنگ اسٹاف کو آرام دیا ہے۔ بھارتی ٹیم کو جمعرات کے روز ٹی ٹوئنٹی ورلڈ کپ کے سیمی فائنل میں انگلینڈ کے ہاتھوں 10 وکٹوں سے شکست کا سامنا کرنا پڑا جس کے بعد کھلاڑیوں کی کارکردگی پر سوالات اٹھنے لگے۔
بہرکیف بھارت اور نیوزی لینڈ کے درمیان اب چھ وائٹ بال میچز ہونے ہیں، جن میں تین T20 اور تین ون ڈے میچز شامل ہیں، جو 18 نومبر کو ویلنگٹن میں شروع ہوں گے۔ ریگولر کپتان روہت شرما، اسٹار بلے باز وراٹ کوہلی، اوپنر کے ایل راہل اور اسپنر روی چندرن اشون جیسے سینئر کھلاڑیوں کو اس دورے پر آرام دیا گیا ہے۔ اس کے علاوہ کوچنگ اسٹاف کو بھی ٹی ٹوئنٹی ورلڈ کپ کے بعد آرم دیا گیا ہے۔
بی سی سی آئی (کرکٹ بورڈ آف انڈیا) کے ذرائع نے یہ معلومات دی۔ یہ پہلا موقع نہیں ہے جب لکشمن کو بھارتی ٹیم میں یہ ذمہ داری دی گئی ہو۔ سابق کرکٹر نے آخری بار زمبابوے اور آئرلینڈ کے دوروں اور جنوبی افریقہ کے خلاف حالیہ ون ڈے ہوم سیریز کے دوران ٹیم کی کوچ کی ذمہ داری سنبھالی تھی۔ آل راؤنڈر ہاردک پانڈیا ٹی ٹوئنٹی سیریز میں ٹیم کی قیادت کریں گے، جبکہ تجربہ کار اوپنر شیکھر دھون ون ڈے ٹیم کی قیادت کریں گے۔
باقاعدہ کپتان روہت بنگلہ دیش کے دورے پر واپس آئیں گے۔ کوہلی اور اشون کی بھی بنگلہ دیش کے دورے کے لیے ٹیم میں واپسی ہوگی جس میں بھارت تین ون ڈے اور دو ٹیسٹ میچ کھیلے گا۔ یہ دورہ 4 دسمبر سے شروع ہوگا۔
مزید پڑھیں:
