آسٹریلیا کے خلاف ٹیسٹ سیریز جیتنے کے بعد بھارتی کرکٹ ٹیم آئی سی سی ورلڈ ٹیسٹ چیمپیئن شپ میں پہلی پوزیشن پر پہنچ گئی۔ چار میچوں کی ٹیسٹ سیریز میں بھارت نے آسٹریلیا کو 2-1 سے شکست دی۔ اس کے ساتھ ہی بھارت نے بارڈر گاوسکر ٹرافی پر اپنا قبضہ برقرار رکھا۔
آسٹریلیا نے ایڈیلیڈ میں کھیلا جانے والا پہلا ٹیسٹ جیت لیا تھا۔ اس ٹیسٹ میں بھارتی ٹیم دوسری اننگز میں محض 36 رنز پر ڈھیر ہوگئی۔
اس کے بعد اجنکیا رہانے کی کپتانی میں ٹیم نے میلبورن میں ٹیسٹ میچ جیت کر سیریز 1-1 سے برابر کر دی تھی جبکہ سڈنی میں ہونے والے تیسرے ٹیسٹ شاندار کھیل کا مظاہرہ کرتے ہوئے میچ ڈرا کیا۔ اس کے بعد آخری اور فیصلہ کُن برسبین ٹیسٹ میچ 3 وکٹوں سے جیت کر سیریز اپنے نام کر لی تھی۔
آئی سی سی ٹیسٹ چیمپیئن شپ پوائنٹس ٹیبل میں بھارت کے پاس 71.7 فیصد پوائنٹس ہیں اور وہ اور 430 پوائنٹس کے ساتھ پہلے نمبر پر ہے۔ نیوزی لینڈ 70 فیصد پوائنٹس اور 420 پوائنٹس کے ساتھ دوسرے نمبر پر ہے جبکہ تیسرے نمبر پر آسٹریلیا ہے جس کے 69.2 فیصد اور 332 پوائنٹس ہیں۔
آئی سی سی ورلڈ ٹیسٹ چیمپیئن شپ پوائنٹس ٹیبل میں سرفہرست دو ٹیمیں رواں برس جون میں لارڈس میں میں فائنل کھیلیں گی۔
گزشتہ روز بھارت اور آسٹریلیا کے مابین چوتھے ٹیسٹ کے اختتام کے بعد آئی سی سی نے ٹویٹ کیا کہ 'بھارت سرفہرست ہے۔ گابا میں شاندار کامیابی کے بعد بھارت آئی سی سی ورلڈ ٹیسٹ چیمپیئن شپ رینکنگ میں پہلے نمبر پر آگیا ہے جبکہ آسٹریلیا تیسری پوزیشن پر پھسل گیا ہے۔
بھارت کو اب پانچ فروری سے انگلینڈ کے ساتھ چار ٹیسٹ میچوں کی گھریلو سیریز کھیلنی ہے۔ اگر بھارتی ٹیم انگلینڈ کے خلاف 0-2 سے جیت جاتی ہے تو وہ جون میں لارڈز میں کھیلے جانے والے ٹیسٹ چییمپئن شپ کے فائنل میں اپنی جگہ محفوظ بنا لے گی لیکن اگر وہ انگلینڈ کے خلاف ایک ٹیسٹ ہار جاتی ہے تو اسے بقیہ تین میچز جیتنے ہوں گے۔
اس کے علاوہ نیوزی لینڈ ٹیم کو جون تک کوئی بھی ٹیسٹ سیریز نہیں کھیلنی ہے۔
میڈیا رپورٹس کے مطابق بھارت کے خلاف ٹیسٹ سیریز میں شکست سے آسٹریلیا کو دھچکا لگا ہے اور اب آسٹریلیا کو جنوبی افریقہ کے خلاف تین میچوں کی ٹیسٹ سیریز سے 89 پوائنٹس حاصل کرنے ہوں گے تب ہی وہ ورلڈ ٹیسٹ چیمپیئن شپ پوائنٹس ٹیبل میں نیوزی لینڈ سے آگے پہنچے اور ایسا تب ہوسکتا ہے جب آسٹریلیا کم از کم دو ٹیسٹ میں جیت کے ساتھ ایک ٹیسٹ ڈرا کرے۔
دوسری جانب بھارت نے آسٹریلیا کو شکست دے کر آئی سی سی کی ٹیسٹ درجہ بندی میں دوسرا مقام حاصل کیا ہے جبکہ کین ولیمسن کی قیادت والی نیوزی لینڈ ٹیم سرفہرست مقام پر ہے۔
