بہتر سے بہتر کارکردگی سے ٹیم کو فتح دلانے کی کوشش رہے گی: فواد عالم

فواد عالم کا کہنا تھا کہ ویسٹ انڈیز کے خلاف پہلا ٹیسٹ بھی ہم بہت قریب آکر ہارے تھے تو کوشش یہی تھی کہ سیریز جیت نہیں سکتے لیکن ڈرا کر سکتے ہیں اور ڈرا کر کے بھی اگلی سیریز کے لیے حوصلے بلند ہوتے ہیں۔

پاکستان کرکٹ ٹیم کے بلے باز فواد عالم نے ٹی20 ورلڈ کپ میں پاکستانی ٹیم سے بہتر کارکردگی کی امید ظاہر کرتے ہوئے کہا ہے کہ عالمی مقابلے میں پاکستانی ٹیم کو ٹاپ فور میں دیکھ رہا ہوں اور وہ ورلڈ کپ جیت بھی سکتی ہے۔

ڈان نیوز کے پروگرام 'ری پلے' میں گفتگو کرتے ہوئے فواد عالم نے کہا کہ میری کوشش یہ ہے کہ پاکستان کے لیے بہتر سے بہتر کارکردگی دکھاتے ہوئے اپنی ٹیم کو فتح دلاؤں۔

ان کا کہنا تھا کہ ویسٹ انڈیز کے خلاف پہلا ٹیسٹ بھی ہم بہت قریب آکر ہارے تھے تو کوشش یہی تھی کہ سیریز جیت نہیں سکتے لیکن ڈرا کر سکتے ہیں اور ڈرا کر کے بھی اگلی سیریز کے لیے حوصلے بلند ہوتے ہیں۔ انہوں نے کہا کہ ویسٹ انڈیز کے خلاف ان کے ہی ملک میں کھیلنا آسان نہیں ہوتا، گیندبازی اور بلے بازی دونوں اچھی ہیں اور کنڈیشنز بھی ان کے لیے سازگار تھیں لیکن مجموعی طور پر ٹیم کی کارکردگی بہت اچھی رہی اور خوشی ہے کہ ٹیم کی جیت میں میرا بھی کردار رہا۔

پہلے ٹیسٹ میچ میں آخری لمحات میں شکست کے حوالے سے بائیں ہاتھ کے بلے باز نے کہا کہ اتنی محنت کے بعد میچ ہارنے پر بہت دکھ ہوتا ہے کیونکہ اگلے ٹیسٹ میچ کے آغاز تک انتظار انتہائی صبر آزما ہوتا ہے۔

یو این آئی