اس میٹنگ میں اراکین جسٹس (سبکدوش) بدر دریز احمد کو ہٹانے کے خلاف احتجاج کر رہے تھے۔
اس دوران بی جے پی کے رکن اسمبلی کے ساتھ بھی ہاتھا پائی ہونے کی خبر ہے۔
دہلی اینڈ ڈسٹرکٹز کرکٹ ایسوسی ایشن کی سالانہ میٹنگ میں ہاتھا پائی ہوئی جس کے بعد سابق کرکٹر اور بی جے پی کے رکن پارلیمان گوتم گمبھیر نے بی سی سی آئی کے صدر سورو گنگولی سے مطالبہ کیا ہے کہ اس معاملے پر نوٹس لیتے ہوئے ڈی ڈی سی اے کو فوری طور تحلیل کر دیں۔
دہلی اینڈ ڈسٹرکٹز کرکٹ ایسوسی ایشن کی سالانہ میٹنگ اس وقت ہنگامہ برپا ہوگیا جب دو فریق کے مابین مارپیٹ کی نوبت آگئی، اس اجلاس میں ایک فریق ریٹائرڈ جسٹس بدر دریز احمد کو ہٹانے کا مطالبہ کر رہا تھا جبکہ ایک فریق ان کے حق میں تھا۔
اس تصادم میں بھارتیہ جنتا پارٹی (بی جے پی) کے رکن اسمبلی او پی شرما کو چوٹ لگ گئی۔
سابق کرکٹر اور بی جے پی کے رکن پارلیمان گوتم گمبھیر نے بی سی سی آئی کے صدر سورو گنگولی کو ٹویٹ کرتے ہوئے قصورواروں پر سخت کارروائی کرنے کا مطالبہ کیا ہے، گوتم گمبھیر نے کہا کہ ڈی ڈی سی اے حد سے باہر چلا گیا ہے۔
انہوں نے کہا کہ 'ڈی ڈی سی اے کے ارکان نے انتہائی شرمناک کام کیا ہے، گوتم گمبھیر نے مطالبہ کیا ہے کہ ڈی ڈی سی اے کو فوری طور تحلیل کیا جائے، ساتھ ہی اس میں شامل قصورواروں پر تاحیات پابندی عائد کی جائے۔
اس سالانہ اجلاس میں مار پیٹ کا ویڈیو سوشل میڈیا پر تیزی سے وائرل ہو رہا ہے، وائرل ویڈیو میں صاف طور پر دیکھا جا سکتا ہے کہ سامنے قطار میں بیٹھے کچھ لوگ سامنے آتے ہیں اور آپس میں الجھ جاتے ہیں۔
یہ لوگ ایک دوسرے پر بری طرح جھپٹتے ہیں اور دھکا مکی کرتے ہیں۔ دونوں فریق میں کون لوگ شامل رہے، اس کی شناخت ابھی تک نہیں ہو پائی ہے، اگرچہ تھوڑی دیر میں ہی یہ معاملہ ٹھنڈا ہوگیا لیکن شروع میں دونوں فریقوں نے ایک دوسرے کے ساتھ جم کرمار پیٹ کی۔
اس معاملے میں ابھی تک بی سی سی آئی صدر کا بیان سامنے نہیں آیا ہے۔
تفصیلات کے مطابق ڈی ڈی سی اے کے جوائنٹ سکریٹری رنجن منچندا بھی اس دوران نظر آئے جب ارکان میں کسی بات کو لے کر اختلاف بڑھا تو ہاتھا پائی کی نوبت آگئی۔
اجلاس کے بعد ڈی ڈی سی اے کی جانب سے ایک بیان آیا ہے، اگرچہ بیان میں تنازع کا کہیں بھی ذکر نہیں ہے، ڈی ڈی سی اے کی جانب جاری بیان میں کہا گیا کہ، 'شکریہ ارکان، ڈی ڈی سے اے بورڈ سالانہ اجلاس میں شامل تمام ارکان کا شکریہ ادا کرتا ہے، اس موسم سرما میں لوگوں کا آنے کا شکریہ، بورڈ کے نقطہ نظر کو آگے بڑھانے کے لیے آپ کا شکریہ'۔
اس اجلاس میں جسٹس دیپک ورما کو دہلی اینڈ ڈسٹرکٹ کرکٹ ایسوسی ایشن (ڈی ڈی سی اے) کا نیا لوک پال مقرر کیا گیا ہے جبکہ اسوسی ایشن کے نئے صدر کے انتخاب کی تاریخ بھی اس اجلاس میں طے کی گئی اور نئے صدر کے عہدے کے لیے انتخابات 13 جنوری کو ہوں گے۔
