ہماچل پردیش نے رنجی ٹرافی ایلیٹ گروپ اے اور بی مقابلے کے چوتھے اور آخری دن ہفتہ کو میزبان اتر پردیش کو 386 رنز کے بڑے فرق سے شکست دے کر چھ پوائنٹس حاصل کئے۔
اٹل بہاری واجپئی اكانا اسٹیڈیم میں ہماچل پردیش کے ویبھو ارورہ نے یوپی کی ہار کی اسکرپٹ جمعہ کو تین اہم وکٹ جھٹک کر پہلے ہی لکھ دی تھی جب 534 رنز کے ہدف کا تعاقب کرتے ہوئے میزبان ٹیم کے چار بلے باز محض 77 رنز جوڑ کر پویلین لوٹ گئے تھے۔
آج قریب 90 منٹ کے کھیل میں مہمان گیند بازوں نے بچے ہوئے چھ وکٹ لےکر جیت کی خانہ پری کر لی۔ اتر پردیش کی دوسری اننگز 148 رن پر سمٹ گئی۔
ہماچل پردیش نے پہلی اننگز میں 220 رن بنائے جس کے جواب میں یوپی کی پہلی اننگز 119 رنز پر سمٹ گئی تھی۔ 101 رنز کی برتری کے ساتھ میدان پر اترے مہمان بلے بازوں نے دوسری اننگز سات وکٹ پر 433 رنز پر ڈکلیئر کر دی اور میزبان ٹیم کو جیت کے لیے 535 رنز کا ہدف دیا جس کے جواب میں یوپی کی دوسری اننگز 40.4 اوور میں 148 رنز پر ہی سمٹ گئی۔
میزبان ٹیم کی پہلی اننگز میں پانچ اور دوسری اننگز میں تین وکٹ لینے والے ہماچل پردیش کے رشی دھون کو مین آف دی میچ کے خطاب سے نوازا گیا۔ ہماچل کی آٹھ میچوں میں یہ دوسری جیت رہی اور وہ 19 پوائنٹس کے ساتھ ایلیٹ گروپ اے بی کے پوائنٹس ٹیبل میں 10 ویں مقام پر رہا۔
یوپی کی آٹھ میچوں میں یہ پانچویں ہار رہی اور وہ 20 پوائنٹس کے ساتھ آٹھویں نمبر پر رہا۔ میزبان ٹیم کی دوسری اننگز کا بوریا بستر باندھنے میں ویبھو ارورہ نے اہم کردار ادا کیا جنہوں نے 41 رن دے کر پانچ وکٹ لئے۔
ان کے علاوہ رشی دھون نے تین اور مینک ڈاگر نے دو وکٹ حاصل کئے ۔یوپی کے آرین جيال نے 56 رنز بنا کر ہار کے فرق کو کم کرنے کی کوشش کی جبکہ ٹیم کے چھ بلے باز دہائی کے اسکور تک بھی پہنچنے میں ناکام ثابت ہوئے اور میزبان ٹیم کو شرمناک شکست کا سامنا کرنا پڑا۔
