کورونا وائرس کے سبب مرکزی حکومت نے لاک ڈاؤن کا اعلان مارچ کے آخر میں کیا تھا جو طویل عرصے تک جاری رہا۔ اس دوران کھلاڑیوں کو باہر جانے اور پریکٹس کرنے سے منع کیا گیا تھا جبکہ تمام کھیلوں کی سرگرمیاں بھی تعطل کا شکار ہوگئی تھیں۔
آئی پی ایل فرینچائزی سن رائیزرس حیدرآباد کھلاڑی بھونیشور کمار نے کہا کہ 'میں لاک ڈاؤن کے پہلے 15 دن میں بہت حوصلہ افزا اور پرجوش تھا۔ اس وقت کوئی نہیں جانتا تھا کہ یہ کب تک چلے گا جبکہ میرے پاس گھر میں مشق کرنے کا کوئی سامان بھی نہیں تھا۔
بھونیشور نے کہا کہ 'میں خود کو فٹ رکھنے کے لیے ورزش کرتا تھا لیکن 15 دن کے بعد مجھے خود کو متحرک رکھنے میں مشکلات کا سامنا کرنا پڑا۔
انہوں نے کہا کہ اس کے بعد میں نے مشق کے لیے کچھ سازوسامان کا آرڈر دیا جس کے بعد چیزیں تھوڑی بہت بدل گئیں۔ ہم اکثر کہتے ہیں کہ ہمارے پاس اپنی فٹنس کو بہتر بنانے کا وقت نہیں ہے۔ میں نے اس لاک ڈاؤن میں اپنی عادت تبدیل کردی۔ میدان میں کارکردگی مختلف ہے لیکن اب میں اپنی فٹنس پر بھی فوکس کر رہا ہوں تاکہ مجھے تقویت پہنچے۔
بھونیشور نے کہا کہ مجھے یاد ہے جب ایک بار میری رفتار بڑھ گئی تھی تو مجھے تقریبا چھ سات ماہ تک تکلیف ہوئی۔ میں اس وقت زخمی نہیں ہوا تھا لیکن میرے جسم کو معمول پرہونے میں وقت لگ رہا تھا۔ میں تھکا ہوا تھا اور میرا جسم کام کے دباؤ کو نہیں سنبھال سکتا تھا۔
