وزیر برائے کھیل کرن ریجیجو نے کہا کہ 'اگر میزبان قوم سے قطع نظر قوانین کے مطابق کھیلوں کا انعقاد کیا جاتا ہے تو بھارت ہر کھیل میں حصہ لینے کے لیے تیار ہے۔'
ایشیا کپ 2020 میں بھارت کی شرکت پر گفتگو کرتے ہوئے ریجیجو نے کہا کہ 'جہاں کہیں بھی میچ کھیلے جاتے ہیں۔ ہم ہر کھیل کے لیے تیار ہیں، اگر ان کا انعقاد قواعد کے مطابق ہوتا ہے تو بھارت اس میں حصہ لے گا۔'
بی سی 'سی آئی کے صدر سوربھ گانگولی نے کہا کہ اگلا 'ایشیا کپ دبئی میں ہونے والا ہے جس میں بھارت اور پاکستان دونوں ٹیمیں ٹورنامنٹ میں حصہ لیں گے۔'
واضح رہے کہ ایشیا کپ اسی برس کے آخر میں کھیلا جانا ہے اور پاکستان رواں برس ایشیاء کپ کی میزبانی کرنے والا تھا لیکن دونوں ممالک کے مابین تناؤ اور پاکستان میں سلامتی کے خدشات کے پیش نظر بی سی سی آئی نے کہا کہ بھارتی ٹیم وہاں سفر نہیں کرے گی۔
بھارت اور پاکستان کے مابین آخری مقابلہ آئی سی سی ورلڈ کپ 2019 میں کھیلا گیا تھا جس میں بھارت نے پاکستان پر 89 رنز سے فتح حاصل کی تھی۔
