پوری دنیا میں پھیل جان لیوا کورونا وائرس کی وجہ سے مختلف اسپورٹس ایونٹ کے ساتھ ساتھ فضائی خدمات، شیئر بازار اور دیگر تجارتی سرگرمیاں ٹھپ ہو کر رہ گئی ہیں اور اب اس کا اثر انڈین پریمیئر لیگ پر بھی دکھائی دے رہا ہے۔
موجودہ حالات کے پیش نظر اس ٹورنامنٹ کے مستقبل پر بھی سوال کھڑے ہوگئے ہیں اور اب اس معاملے کا حل 14 مارچ کو ممبئی میں ہونے والی آئی پی ایل کی گورننگ کونسل کی میٹنگ میں کیا جائے گا۔
گذشتہ روز مدراس ہائی کورٹ میں ایک شخص نے عرضی داخل کر کے آئی پی ایل کو ملتوی کرنے کا مطالبہ کیا تھا جبکہ بی سی سی آئی ذرائع سے ملی معلومات کے مطابق اس ٹورنامنٹ میں غیر ملکی کھلاڑیوں کو 15 اپریل تک بھارت کا ویزا نہیں دیا جائے گا، جس کے بعد کرکٹ شائقین میں بے چینی کا ماحول ہے۔
ملک میں کورونا وائرس کے کیسز کو دیکھتے ہوئے حکومت نے ایڈوائزری جاری کرکے تمام غیر ملکی کھلاڑیوں کا ویزا 15 اپریل تک معطل کر دیا ہے۔
چینئی سپر کنگز کے سی ای او کاشی وشوناتھ نے کہا کہ 'مرکزی حکومت کی جانب سے جاری کردی تازہ ایڈوائزری کے بعد غیر ملکی کھلاڑیوں کا 15 اپریل سے پہلے آئی پی ایل مین کھیلنا ناممکن ہے تاہم ان کھلاڑیوں کا کھیلنا اسی وقت ممکن ہے جب بی سی سی آئی ان غیر ملکی کھلاڑیوں کو خصوصی اجازت نامہ دلوائے۔
واضح رہے کہ ملک میں اب تک کورونا وائرس کے 73 معاملات سامنے آچکے ہیں جبکہ اس جان لیوا وائرس کے باعث پوری دنیا میں اب تک چار ہزار سے زائد اموات ہو چکی ہیں۔
