آسٹریلیا کو اسی کے گھر میں دھول چٹا کر تاریخ رقم کرنے والی بھارتی کرکٹ ٹیم کے کھلاڑی لوٹے۔
بارڈر گاوسکر ٹرافی میں آسٹریلیا کو 2-1 سے شکست دے کر لگاتار تیسری مرتبہ ٹرافی جیتنے کے بعد بھارتی ٹیم آج وطن پہنچی۔ کھلاڑیوں کی آمد پر ایئرپورٹ پر ان کا استقبال کیا گیا۔
گابا میں آسٹریلیا کے خلاف تاریخی جیت درج کرنے کے بعد بھارتی کرکٹرز روہت شرما، اجنکیا رہانے، پرتھوی شا اور کوچ روی شاستری ممبئی ایئرپورٹ اور رشبھ پنت دہلی پہنچ گئے۔
اس موقع پر ممبئی کرکٹ ایسوسی ایشن (ایم سی اے) نے کہا کہ 'جلد ہی ہماری ایپیکس باڈی کی میٹنگ ہوگی اور ہم اپنے کھلاڑیوں اور ٹیم جس نے آسٹریلیا میں غیر معمولی کارکردگی کا مظاہرہ کیا ہے کو اعزاز سے نوازنے کا فیصلہ کریں گے۔
گزشتہ روز گابا میں سیریز کے آخری ٹیسٹ میں بھارت نے آسٹریلیا کو 3 وکٹوں سے شکست دے کر تاریخی سیریز 2-1 سے جیت لی۔
روہت شرما نے آخری دو ٹیسٹ میں 129 رنز بنائے اور ٹیم کو عمدہ آغاز دلانے میں کلیدی کردار ادا کیا۔
بھارتی کپتان رہانے نے دوسرے ٹیسٹ میں میچ فاتحانہ اننگز کھیلی تھی جس کی وجہ سے مہمان ٹیم نے سیریز میں حیرت انگیز واپسی کی۔
وکٹ کیپر بلے باز رشبھ پنت نے گابا ٹیسٹ کی چوتھی اننگز میں 89 رنز کی ناقابل شکست اننگ کھیلی تھی جس کی وجہ سے بھارت نے مجموعی طور پر 328 رنز کا ہدف حاصل کرکے سیریز اپنے نام کی۔
جیسے ہی بھارت نے بارڈر گاوسکر ٹرافی جیتی، بی سی سی آئی نے 5 کروڑ روپے بونس کا اعلان کیا۔
آسٹریلیا میں اس یادگار جیت کے ساتھ ہی بھارتی ٹیم آئی سی سی ٹیسٹ درجہ بندی میں دوسرے مقام پر جبکہ آئی سی سی ٹیسٹ چیمپیئن شپ میں پہلے مقام پر پہنچ گئی ہے۔
