پاکستان رواں برس ستمبر میں ایشیاء کپ ٹی ٹونٹی ٹورنامنٹ کی میزبانی کرنے والا ہے لیکن موجودہ سیاسی ماحول کے پیش نظر بھارت کی شرکت پر شکوک و شبہات کے بادل منڈلا رہے ہیں۔
وسیم خان نے اشارہ دیا ہے کہ اگر ایشین کرکٹ کونسل اجازت دیتا ہے تو ایشیاء کپ میں بھارت کے لیگ میچ کو غیر جانبدار جگہ پر رکھا جاسکتا ہے جس کا فیصلہ ایشین کرکٹ کونسل کرے گی۔
پی سی بی کے سی ای او نے یہ بھی واضح کیا ہے کہ انہوں نے یہ کبھی نہیں کہا ہے کہ اگر بھارتی ٹیم ایشیاء کپ کے لیے پاکستان نہیں آتی ہے تو پاکستان کی ٹیم بھی ٹی ٹوئنٹی ورلڈ کپ 2021 میں بھارت نہیں جائے گی۔
انہوں نے کہا کہ سوال یہ ہے کہ اگر بھارت پاکستان کا دورہ نہیں کرتا تو ایسی صورت میں میرا جواب یہ ہوگا کہ ایشین کرکٹ کونسل کو اس بارے میں فیصلہ لینا پڑے گا، چونکہ ہمیں میزبانی کے حقوق مل گئے ہیں تو ہمیں پوری امید ہے کہ ایشیا کپ پاکستان میں ہی ہوگا۔
خان نے کہا کہ اس وقت ایشین کرکٹ کونسل کو فیصلہ کرنا چاہئے کہ بھارت کا میچ کہاں منعقد کرنا ہے۔
یہ پوچھے جانے پر کہ کیا بھارت اپنے میچ غیر جانبدار جگہ پر کھیل سکتا ہے؟ تو خان نے کہا کہ اگر بھارت بمقابلہ پاکستان کا فائنل ہوتا ہے تو پھر اس کا فیصلہ اے سی سی پر منحصر ہوگا کہ فائنل کہاں کھیلا جائے گا۔ فارمیٹس اور فکسچرز پر ابھی تک بات چیت نہیں ہوسکی ہے۔
پی سی بی کے سی ای او نے کہا کہ ہم نے کبھی بھی یہ نہیں کہا کہ پاکستان بھارت کا دورہ نہیں کرے گا، ابھی تک صرف ایشیا کپ کے بارے میں گفتگو جاری ہے جس کی میزبانی ہمیں ستمبر میں کرنی ہے۔
انہوں نے اعتراف کیا کہ موجودہ صورتحال باہمی کرکٹ تعلقات کے لیے سازگار نہیں ہے۔
