پاکستان کے خلاف ٹی 20 سیریز میں آرام کی غرض سے نہ کھیلنے والے تیز گیند باز جوفرا آرچر اور وکٹ کیپر بلے باز جوز بٹلر کی آسٹریلیا کے خلاف آئندہ تین ٹی 20 میچوں کی سیریز کے لیے واپسی ہوئی ہے۔
جو روٹ کو ٹی 20 اسکواڈ میں شامل نہیں کیا گیا ہے جبکہ وہ آسٹریلیا کے خلاف تین یک روزہ میچوں میں ٹیم کا حصہ ہوں گے۔
اس کے علاوہ مارک ووڈ اور سیم کیرن کو بھی ٹی 20 اور یک روزہ دونوں ٹیموں میں شامل کیا گیا ہے جبکہ کرس ووکس بھی یک روزہ ٹیم میں جگہ بنانے میں کامیاب رہے ہیں۔
انگلینڈ کے نوجوان کھلاڑی ثاقب محمود جو پاکستان کے خلاف ٹی 20 سیریز کے لیے اسکواڈ کا حصہ تھے کو بھی آسٹریلیا کے خلاف اسکواڈ میں شامل کیا گیا ہے۔
آسٹریلیا کے خلاف ٹی 20 اسکواڈ کے ریزرو کھلاڑیوں میں لیام لیونگ اسٹون اور ثاقب محمود ہیں۔
یک روزہ اور ٹی 20 ٹیموں کی قیادت ایون مورگن کریں گے۔ انگلینڈ ٹیم کے قومی سلیکٹر ایڈ اسمتھ نے کہا ہے کہ رواں موسم گرما میں آسٹریلیا کے خلاف دونوں سیریز انتہائی دلچسپ ہوں گی۔
انہوں نے کہا کہ ہم نے دونوں سیریز کے لیے مضبوط اسکواڈز کا انتخاب کیا ہے۔ ہم آئندہ ٹی 20 ورلڈ کپ کی تیاریوں کے لیے بھی کام جاری رکھے ہوئے ہیں۔
واضح رہے کہ انگلینڈ اور آسٹریلیا کے درمیان تین ٹی 20 میچوں کی سیریز کا پہلا میچ 4 ستمبر، دوسرا 6 ستمبر اور تیسرا میچ 8 ستمبر کو دی ایزاس باؤل میں کھیلا جائے گا جبکہ تین ون ڈے میچوں کی سیریز کا پہلا میچ 11 ستمبر، دوسرا 13 ستمبر اور تیسرا اور آخری میچ 16 ستمبر کو مانچسٹر میں کھیلا جائے گا۔ ون ڈے سیریز کے تینوں میچ اولڈ ٹریفورڈ، مانچسڑ میں کھیلے جائیں گے۔
اس کے علاوہ ویسٹ انڈیز اور پاکستان کے خلاف ٹیسٹ سیریز ہونے کی وجہ سے جو روٹ، جوفرا آرچر جیسے کھلاڑیوں کو آئرلینڈ اور پاکستان کے خلاف ٹی 20 سیریز سے آرام دیا گیا تھا لیکن اب انگلینڈ کو آسٹریلیا کے خلاف کوئی ٹیسٹ میچ نہیں کھیلنا ہے ایسی صورتحال میں یہ کھلاڑی ایک بار پھر محدود اوورز کی ٹیم میں واپس آئے ہیں۔
جیسن رائے ہیمسٹرنگ کی وجہ سے ٹی 20 سیریز نہیں کھیل سکیں گے لیکن وہ ٹیم کے ساتھ ہی رہیں گے اور اگر وہ یک روزہ سیریز تک فٹ ہوگئے تو وہ ون ڈے سیریز میں واپس آسکتے ہیں۔
انگلینڈ ٹی 20 ٹیم:
ایون مورگن (کپتان)، معین علی، جوفرا آرچر، جونی بیریسٹو ، ٹام بنٹن، سیم بلنگز، جوز بٹلر، سیم کیرن، ٹام کیرن، جو ڈینلی، کرس جارڈن، ڈیوڈ ملن، عادل رشید اور مارک ووڈ۔
یک روزہ ٹیم:
ایون مورگن(کپتان)، معین علی، جوفرا آرچر، جانی بیریسٹو، ٹام بنٹن، سیم بلنگز، جوز بٹلر، سیم کیرن، ٹام کیرن، عادل رشید ، جو روٹ، کرس ووکس اور مارک ووڈ
