آسٹریلیا کے سلامی بلے باز ڈیوڈ وارنر چوٹ کی وجہ سے ایڈیلیڈ میں 17 دسمبر سے بھارت کے خلاف شروع ہونے والے پہلے ٹیسٹ میچ سے باہر ہوگئے ہیں۔ انہیں پوری فٹنس حاصل کرنے میں ابھی مزید 10 دنوں کا وقفہ درکار ہے جس کے بعد وہ 26 دسمبر سے میلبورن میں ہونے والے دوسرے ٹیسٹ میچ میں واپسی کرسکتے ہیں۔
وارنر فی الحال خصوصی علاج کے لیے سڈنی میں رہیں گے جبکہ ٹیم کے بقیہ کھلاڑی ایڈیلیڈ روانہ ہو جائیں گے۔
ڈیوڈ وارنر نے کہا کہ 'میں تیزی سے صحتیاب ہورہا ہوں اور علاج کے لیے مجھے سڈنی میں ہی رکنا بہتر ہوگا۔ میں چوٹ سے کافی حد تک نجات حاصل کرچکا ہوں لیکن ٹیسٹ میچ میں اپنا 100 فیصدی دینے کے لیے ابھی بھی مجھے ذہنی طور پر خود کو تیار کرنا باقی ہے۔
انہوں نے کہا کہ فِٹنس ثابت کرنے کے لیے مجھے وکٹوں کے بیچ دوڑ لگانا اور فیلڈنگ کرنا ہوگا۔ میں ابھی اپنی فِٹنس کے تعلق سے پوری طرح مطمئن نہیں ہوں اور مجھے مکمل طور پر صحت یاب ہونے میں ابھی مزید 10 دن لگیں گے۔
آسٹریلیا کرکٹ ٹیم کے کوچ جسٹِن لینگر کو وارنر کے باکسنگ ڈے ٹیسٹ تک پوری طرح فٹ ہونے کی توقع ہے۔ انہوں نے کہا کہ وارنر جس مقام پر ہیں اس کے لیے انہوں نے کافی جدوجہد کی ہے اور ہمیں امید ہے کہ وہ میلبورن ٹیسٹ کے لیے پوری طرح فٹ رہیں گے۔
ڈیوڈ وارنر کی غیر موجودگی میں ول پکووسکی ان کی جگہ کے لیے دعویدار ہیں لیکن انہیں انڈیا اے کے خلاف تین روزہ پریکٹس میچ کے تیسرے دن کارتک تیاگی کی گیند ہیلمیٹ پر لگ گئی تھی۔ پکووسکی ہلکے کنکشن کے شکار ہوئے ہیں اور کنکشن سے نجات حاصل کرنے کی حالت میں ہی ایڈیلیڈ ٹیسٹ میں ڈیبیو کرسکتے ہیں۔
