نیوزی لینڈ کے تجربہ کار بلے باز راس ٹیلر بھارت کے خلاف جمعہ کو ہونے والے پہلے ٹیسٹ کے دوران ریکارڈ درج کراتے ہوئے اپنے کیرئیر کا 100 واں بین الاقوامی ٹیسٹ میچ کھیلیں گے۔
ٹیلر اب تک 99 میچ کھیل چکے ہیں اور بھارت کے خلاف ویلنگٹن میں 21 فروری کو ہونے والا میچ ان کے کیرئیر کا 100 واں بین الاقوامی ٹیسٹ میچ ہوگا۔
اس دوران ٹیلر کرکٹ کے تینوں فارمیٹ میں 100 میچ کھیلنے والے پہلے بلے باز بن جائیں گے۔ 35 سالہ ٹیلر نے 2007 میں ٹیسٹ کرکٹ میں قدم رکھا تھا۔
چند روز قبل انہوں نے انکشاف کرتے ہوئے کہا تھا کہ انہیں اپنے پہلے ٹیسٹ کے بعد ایسا لگا تھا کہ وہ پھر کبھی نیوزی لینڈ کے لئے ٹیسٹ میچ نہیں کھیل پائیں گے۔
قابل ذکر بات یہ ہے کہ ٹیلر نے جنوبی افریقہ کے خلاف اپنے پہلے ٹیسٹ میں 15 اور چار رن بنائے تھے۔ اسی طرح دوسرے مقابلے میں 17 اور آٹھ رن ہی جوڑ پائے تھے۔
چند روز قبل ٹیلر نے کہا جنوبی افریقہ کے خلاف پہلے ٹیسٹ کے بعدمجھے لگا کہ میں اب ٹیسٹ کرکٹ نہیں کھیل سکوں گا ۔ میں بہت خوش نصیب تھا کیونکہ 2005 میں ٹی ۔20 کرکٹ کا آغاز ہوا اور 2006 میں میں نے پہلا قدم رکھا ۔ وقت کے ساتھ مجھے میری کارکردگی کے پیش نظر ٹیم میں چنا گیا ۔ کیرئیر میں وقت کی بہت اہمیت ہے۔
انہوں نے کہا جنوبی افریقہ کے ساتھ پہلی سیریز کے بعد مجھے بنگلہ دیش کے خلاف ٹیم میں جگہ نہیں ملی۔
اس کے بعد میں نے انگلینڈ کے خلاف گھریلو سرزمین پر ٹیسٹ سیریز کھیلی اور پہلے مقابلے میں ہی سنچری بنائی۔ اس وقت مجھے خود پر اعتماد ہوا کہ میں اس کی سطح کی بلے بازی کر سکتا ہوں۔
ٹیلر نے 99 ٹیسٹ میچوں میں 46.28 کی اوسط سے 7174 رن بنائے ہیں جس میں 19 سنچریاں اور 33 نصف سنچریاں شامل ہیں۔
اس کے علاوہ انہوں نے 231 ون ڈے میچوں میں 8570 رن بنائے جس میں 21 سنچری اور 51 نصف سنچری شامل ہیں۔
ٹیلر نے 100 ٹی - 20 میچوں میں سات نصف سنچریوں کی مدد سے 1909 رن بنائے ہیں۔
