پاکستان نے انگلینڈ کے خلاف آئندہ تین میچوں کی ٹی20 سیریز کے لئے 17 کھلاڑیوں کے ناموں کا اعلان کیا ہے جس میں سابق کپتان سرفراز احمد کی ٹیم میں واپسی ہوئی ہے۔
انگلینڈ اور پاکستان کے درمیان 28 اگست سے تین میچوں کی ٹی ٹوئنٹی سیریز کھیلی جائے گی۔ دونوں ٹیموں کے مابین سیریز کے میچ 28 اور 30 اگست کے علاوہ یکم ستمبر کو اولڈ ٹریفورڈ مانچسٹر میں کھیلے جائیں گے۔
پاکستانی کرکٹ ٹیم کے ہیڈ کوچ اور چیف سلیکٹر مصباح الحق کا کہنا ہے کہ انگلینڈ کے خلاف بھی تقریباً اسی ٹیم کا انتخاب کیا گیا ہے جوکہ گزشتہ کئی ماہ سےمحدود طرز کی کرکٹ میں پاکستان کی نمائندگی کررہی ہے۔
انہوں نے کہا کہ پی ایس ایل، انڈر 19 کرکٹ اور ڈومیسٹک کرکٹ میں شاندار کارکردگی کا مظاہرہ کرنے والے نوجوان بلے باز حیدر علی اور نسیم شاہ کو ٹی ٹوئنٹی اسکواڈ میں شامل کر لیا گیا ہے۔
چیف سلیکٹر کا کہنا تھا کہ تجربہ کار فاسٹ بالرز محمد عامر اور وہاب ریاض کے علاوہ سرفراز احمد اور فخر زمان کی بھی ٹی ٹوئنٹی ٹیم میں واپسی ہوئی ہے۔ مصباح الحق نے کہا کہ عمومی طور پر ٹی ٹوئنٹی کرکٹرز کو ایک دوسرے کے ساتھ وقت گزارنے میں کم وقت ملتا ہے تاہم عالمی وبا کورونا وائرس کے باعث پاکستان سے تقریباً ایک ساتھ پرواز کے سبب محدود طرز کی کرکٹ میں پاکستان کی نمائندگی کرنیوالے یہ کرکٹرز کچھ عرصے سے ایک ساتھ ٹریننگ کر رہے ہیں، لہٰذا انہیں بھی انگلش کنڈیشنز سے ہم آہنگی کا ایک اچھا موقع ملا ہے۔
ہیڈ کوچ پر امید ہیں کہ پاکستان اور انگلینڈ کے مابین ٹی ٹونٹی سیریز میں ایک اچھا مقابلہ دیکھنے کو ملے گا۔
پاکستان نے اس فہرست میں 19 سالہ نسیم شاہ اور حیدر علی کو ٹیم میں شامل کیا ہے۔ اس کے علاوہ تجربہ کار محمد حافظ، شعیب ملک اور وہاب ریاض کو بھی اس سیریز کے لئے شامل کیا گیا ہے۔
انگلینڈ کے خلاف ٹی ٹوئنٹی سیریز کے لئے پاکستانی ٹیم :
بابر اعظم (کپتان)، فخر زمان ، حیدر علی ، حارث رؤف ، افتخار احمد ، عماد وسیم ، خوشدل شاہ ، محمد حفیظ ، محمد حسنین ، محمد رضوان ، محمد عامر ، نسیم شاہ ، سرفراز احمد ، شاداب خان ، شاہین شاہ آفریدی ، شعیب ملک اور وہاب ریاض۔
