کورونا وائرس کی وجہ سے کئی ممالک کے کرکٹ بورڈ کی اقتصادی حالت درست نہیں ہے اور ایسے میں بی سی سی آئی نے کنٹریکٹ کھلاڑیوں کا بقایہ ادا کیا ہے۔
بی سی سی آئی نے ساتھ ہی کہا کہ وہ اس کی وجہ سے بے یقینی کی صورت حال کے باوجود کسی کو پریشان نہیں ہونے دے گا۔ غور طلب ہے کہ انگلینڈ اور آسٹریلیا کے کرکٹ بورڈ نے کھلاڑیوں کی تنخواہ میں کمی کے اشارے دیے ہیں۔
بھارتی کرکٹ کنٹرول بورڈ (بی سی سی آئی) نے کہا ہے کہ ملک میں 24 مارچ سے جاری لاک ڈاؤن کے درمیان بی سی سی آئی کسی بھی صورتحال کا سامنا کرنے کے لئے تیار ہے۔
بورڈ نے مرکزی معاہدے میں شامل کھلاڑیوں کے سہ ماہی کے بقایہ ادا کرنے کا فیصلہ لیا ہے۔ اس کے علاوہ انڈیا اور انڈیا اے کے لئے کھیلنے والے کھلاڑیوں کی میچ فیس بھی مالی سال کے آخر تک مکمل طور پر ادا کر دی جائے گی۔
بورڈ نے کہا کہ ایک کرکٹ بورڈ نے اپنے کھلاڑیوں کو چھٹی پر ڈال دیا ہے جبکہ دنیا بھر میں ہر جگہ تنخواہ میں تخفیف کے تعلق بحث جاری ہے لیکن بی سی سی آئی اپنے کھلاڑیوں کا خیال رکھنے کا اہل ہے۔ اس کے بین الاقوامی اور گھریلو کرکٹر پریشان نہیں ہوں گے۔
