بی سی سی آئی سے سری سنت کو راحت

بھارتی کرکٹ کنٹرول بورڈ نے تیز گیند بازی ایس سری سنت پرعائد تاحیات کرکٹ کھیلنے پر پابندی کی سزا کا خاتمہ کر کے اسے سات برس کر دیا ہے۔

انڈین پریمیئر لیگ میں اسپاٹ فکسنگ معاملے میں تاحیات کرکٹ کھیلنے کی پابندی کا سامنا کر رہے بھارتی کرکٹ ٹیم کے تیز گیند باز ایس سری سنت کو آج بی سی سی آئی نے بڑی راحت دیتے ہوئے تاحیات پابندی کو کم کرکے سات برس کردی ہے۔

بشکریہ ٹویٹر

سری سنت پر 13 ستمبر سنہ 2013 میں اسپاٹ فکسنگ معاملے میں تاحیات کرکٹ کھیلنے پر پابندی عائد کی تھی لیکن اب ان کی سزا کی میعاد کم کرکے سات برس کردی گئی ہے اور 13 ستمبر سنہ 2020 کو یہ سزا ختم ہوگی اور سری سنت کرکٹ کھیلتے ہوئے نظر آئیں گے۔

سری سنت پر 13 ستمبر سنہ 2013 میں تاحیات پابندی عائد کی گئی تھی، اس بنا پر ان کی سات برس پابندی کی سزا سنہ 2013 سے ہی دیکھی جائے گی جو آئندہ برس ستمبر ماہ میں مکمل ہو جائے گیْ

واضح رہے کہ اس سے قبل رواں برس مارچ مہینے میں سپریم کورٹ نے آئی پی ایل اسپاٹ فکسنگ معاملے سری سنت پر عائد تاحیات پابندی کو ختم کرکے بی سی سی آئی لوک پال کو ہدایت دی تھی کہ تین مہینے کے اندر سری سنت کے تعلق سے سزا متعین کرے۔

کورٹ نے بی سی سی آئی سے کہا تھا کہ سری سنت کو اپنی صفائی پیش کرنے کا موقع دیا جائے۔

اس سے قبل سپریم کورٹ کی جانب سے تاحیات پابندی کے خاتمے کے بعد سری سنت نے کہا تھا کہ 'جب آشیش نہرا 38 برس کی عمر تک کرکٹ کھیل سکتے ہیں تو میں کیوں نہیں کھیل سکتا جبکہ میں ابھی 36 برس کا ہی ہوں اور میں اب بھی کرکٹ پریکٹس کرتا ہوں۔