بھارت کے بیڈمنٹن کھلاڑی سائی پرنیت اپنی بہتر کارکردگی کا سلسلہ برقرار نہیں رکھ سکے اور جاپانی کھلاڑی کینٹو موموٹا کے سامنے دباؤ نہیں جھیل پائے اور 18-21، 12-21 سے راست سیٹوں میں شکست کھا گئے۔
واضح رہے کہ سائی کی جاپانی کھلاڑی کے خلاف مسلسل تیسری شکست ہے۔
عالمی درجہ بندی میں پہلے مقام پر قابض موموٹا کے سامنے بھارتی کھلاڑی زیادہ دیر نہیں ٹک سکے اور 46 منٹ میں ہی گھٹنے ٹیک دیے۔
حالاںکہ پہلے گیم میں مقابلہ برابری کا رہا اور دوںوں کھلاڑیوں نے اچھی کوشش کی لیکن آخر میں جاپانی کھلاڑی نے بازی ماری اور پہلا گیم جیت گئے جبکہ دوسرے گیم میں پرنیت کے حوصلے پست نظر آئے اور جاپانی کھلاڑی کے شاٹس کا جواب نہیں دے سکے۔
دوسرا گیم ایک وقت تقریباً برابری پر تھا جس میں موموٹا کے 11 اور پرنیت کے 9 پوائنٹس تھے لیکن اس کے بعد جاپانی کھلاڑی نے جارحانہ انداز میں کھیل کر فائنل کا ٹکٹ حاصل کر لیا۔
