پی وی سندھو تاریخ رقم کرنے مں کامیاب رہی لیکن اسے چھوڑ کر ان کی کارکردگی کو پورے سال کمی دیکھنے کو ملی جبکہ نوجوان کھلاڑی لکشے سین بھارتی بیڈمنٹن کے نئے اسٹار بن کر ابھرے۔
چراغ شیٹی اور ساتوك سائی راج رینكي ریڈي کی جوڑی نے سال 2019 میں مرد ڈبلز مقابلوں میں کچھ شاندار مظاہرہ کیا اور اگلے سال کے ٹوکیو اولمپک کے لئے امید بندھا دی۔ سندھو کے عالمی اعزاز، لکشے کے سال کے پانچ خطاب اور اپنی سب سے بہترین 32 ویں رینکنگ اور چراغ شیٹی اور ساتوك کی مرد ڈبلز میں شاندار کارکردگی اس سال بھارتی بیڈمنٹن میں چند نمایاں کامیابیاں رہیں۔سندھو نے اگست میں جاپان کی نوجومي اوكهارا کو مسلسل گیموں میں شکست دے کر عالمی چمپئن شپ جیتنے کے ساتھ نئی تاریخ رقم کی۔
وہ یہ کامیابی حاصل کرنے والی پہلی ہندوستانی کھلاڑی بنی۔ سندھو اس خطاب سے پہلے تک اور اس خطاب کو جیتنے کے بعد سال کے آخر تک جدوجہد کرتی رہیں۔ ان کا پورے سال میں یہی واحد خطاب رہا۔
عالمی چمپئن شپ کے بعد سات ٹورنامنٹوں میں وہ صرف ایک ٹورنامنٹ کے کوارٹر فائنل میں پہنچیں اور دیگر ٹورنامنٹوں میں ان کا بوریا بستر پہلے یا دوسرے راؤنڈ میں بندھتا رہا۔
سال کے آخری ورلڈ ٹور فائنلس میں سندھو اپنے گروپ کے پہلے دو میچ ہار کر سیمی فائنل کی دوڑ سے باہر ہو گئیں۔ انہوں نے اپنا آخری میچ جیت لیا لیکن تب تک کافی دیر ہو چکی تھی۔
سندھو نے گزشتہ سال یہ خطاب جیتا تھا اور اس کے بعد کے 12 مہینوں میں انہوں نے عالمی چمپئن شپ کے طور پر صرف ایک خطاب جیتا۔اپنی کارکردگی میں اتار چڑھاو کے باوجود سندھو ٹوکیو اولمپکس میں بھارت کے لئے بیڈمنٹن میں سب سے بڑی تمغہ امید مانی جا رہی ہیں لیکن 2020 میں انہیں اپنے کارکردگی میں تسلسل لانا ہوگی۔
سندھو کی غیر ملکی کوچ کم جی ہیون کو ان کی عالمی چمپئن شپ کی کامیابی کا کریڈٹ گیا لیکن ہیون نے نجی وجوہات کا حوالہ دیتے ہوئے استعفی دے دیا جس کے بعد سندھو کی کارکردگی میں زبردست کمی دیکھنے کو ملی۔ہندستان کی دوسری سرکردہ کھلاڑی سائنا نہوال پورے سال اپنی فارم اور فٹنس سے جدوجہد کرتی رہیں اور وہ اس کھلاڑی کی جھلک کے طور پر دکھائی نہیں دیں جس نے 2012 اولمپکس میں کانسی اور 2018 میں دولت مشترکہ کھیلوں میں سندھو کو شکست دے کر گولڈ میڈل جیتا تھا۔ مردوں کے سنگلز میں كندامبي سری کانت نے خاصا مایوس کیا جبکہ سوربھ ورما گھریلو ٹورنامنٹ سید مودی انٹرنیشنل کے فائنل میں پہنچ کر رنر اپ بنے۔
چراغ شیٹی اور ساتوك نے اگست میں تھائی لینڈ اوپن میں مردوں کے ڈبلز کا طلائی تمغہ جیتا اور یہ کامیابی حاصل کرنے والی وہ پہلی ہندستانی جوڑی بنے۔ ساتوک اور چراغ فرانسیسی اوپن کے فائنل میں پہنچ کر رنر اپ بنے اور انہوں نے ڈبلز مقابلوں میں سب سے زیادہ امید بندھائی ہے۔ہندستان کی ابھرتے ہوئے اسٹار لکشے سین نے اس سال شاندار کارکردگی کا مظاہرہ کیا ۔
سال کے آخری مہینے دسمبر میں ڈھاکہ میں بنگلہ دیش انٹرنیشنل چیلنج بیڈمنٹن ٹورنامنٹ کا خطاب جیت لیا۔ ٹاپ سیڈ 18 سالہ لکشے نے فائنل میں ملائیشیا کے ليوگ جن ہاؤ کو 50 منٹ میں 22-20، 21-18 سے شکست دی۔18 سال کے لکشے گزشتہ 12 ماہ کے دوران چھ بار کسی ٹورنامنٹ کے فائنل میں پہنچے ہیں، جس سے گزشتہ تین ماہ میں انہوں نے پانچواں ٹائٹل جیت لیا۔ اس سے پہلے انہوں نے اسکاٹش اوپن، سارلورلكس، نيدرلینڈس اوپن اور بیلجئیم اوپن کا خطاب جیتا تھا۔
بھارتی بیڈمنٹن 2019 میں اتار چڑھاو کے دور سے گزرتا رہا اور کچھ کامیابیوں کے علاوہ زیادہ تر ٹورنامنٹوں میں ہندوستان کو مایوسی ہی ہاتھ لگی۔ ہندستان کو اگر مسلسل تیسرے اولمپکس میں بیڈمنٹن میں تمغہ جیتنا ہے تو اس کے کھلاڑیوں کو نئے سال میں اپنی کارکردگی میں تسلسل لانا ہوگا۔
