بی جے پی کی مرکزی حکومت کے منظور کردہ زرعی قوانین کے خلاف کسانوں کا احتجاج دو مہینوں سے بھی زیادہ طویل ہوگیا ہے۔ جس پر کئی گوشوں کی جانب سے کسانوں کے حق میں بیانات جاری کیے گئے ہیں۔ اسی طرح عالمی شہرت یافتہ امریکی گلوکارہ ریحانہ نے بھارتی کسانوں کے حق میں آواز اٹھائی جس کے بعد بھارتی کرکٹ ٹیم کے کپتان وراٹ کوہلی کو ٹوئٹ کرنا پڑ گیا۔
ویراٹ کوہلی جو کہ اس معاملے پر کافی وقت سے خاموش تھے انہوں نے ریحانہ کی ٹوئٹ کے بعد ٹوئٹر پر پیغام میں لکھا کہ ہم سب اختلاف رائے کے اس وقت میں متحد رہیں۔ کسان ہمارے ملک کا اہم حصہ ہیں۔ وراٹ کوہلی نے لکھا کہ مجھے یقین ہے کہ فریقین کے درمیان امن وامان کی بحالی اور ایک ساتھ آگے بڑھنے کے لئے دوستانہ حل تلاش کر لیا جائے گا۔
واضح رہے کہ ریحانہ نے کسانوں پر تشدد سے متعلق مضمون کو اپنے ٹوئٹر اکاؤنٹ پر شیئر کرتے ہوئے لکھا تھا کہ ہم اس بارے میں بات کیوں نہیں کرتے۔ ریحانہ کی ٹوئٹ پر بالی ووڈ اداکارہ کنگنا رناوت نے جواب دیتے ہوئے کسان مظاہرین کو دہشت گرد قرار دیا اور کہا کہ یہ کسان بھارت کو تقسیم کرنا چاہتے ہیں تا کہ چین بھارت پر قابض ہوجائے۔
