ہندی فلموں کے مشہور کوریوگرافر و ڈائریکٹر ریمو ڈی سوزا مرحوم کوریوگرافر سروج خان کی بایوپک بناسکتے ہیں۔
کوریوگرافر سروج خان کا حال ہی میں انتقال ہوا ہے۔ ان کی زندگی پر تین مختلف ہدایت کار فلمیں بنانا چاہتے ہیں۔ لیکن سروج خان صرف ریمو ڈی سوزا کے ساتھ کام کرنے کی خواہش مند تھیں۔
سروج خان کی بیٹی سکینہ نے بتایا کہ 'ڈائریکٹر کنال کوہلی، کوریوگرافر اور ڈائریکٹر بابا یادو کی اہلیہ اور پھر ریمو ڈی سوزا نے ممی سے ان کی بائیوپک کے لئے بات کی تھی۔ ایک دن جب میں نے ممی سے پوچھا کہ وہ ذاتی طورپر کس کے ساتھ اپنی بائیوپک بنانا چاہتی ہیں تو انہوں نے ریمو ڈی سوزا کا نام لیا۔'
انہوں نے مجھے بتایا کہ 'وہ ریمو کے ساتھ اپنی زندگی کی کہانی پر ایک فلم بنانا چاہیں گی کیونکہ ریمو کی زندگی کی کہانی بھی زیرو سے ہیرو بننے کی ہے'۔
ریمو ڈی سوزا نے بتایا کہ 'میری فلم کلنک کے سیٹ پر ان سے بات ہوئی تھی۔ لاک ڈاؤن سے پہلے ہماری بات ہوئی تھی۔ حالانکہ بایوپک کے بارے میں بات کرنا تھوڑی جلدبازی ہوجائے گی۔ میں سکینہ سے مل کرجلد اس معاملے پر بات آگےکروں گا'۔
