بالی وڈ کی مشہور و معروف کوریو گرافر سروج خان کی موت پر آج انہیں ہر خاص و عام انسان یاد کر رہا ہے، ادکار ان کے گذارے ہوئے خوبصورت لمہے یاد کر رہے ہیں، اس کے ساتھ ان سب اداکاروں کی بات ہو رہی ہیں، جن کا کریئر سروج خان نے بنایا۔
ایسا کہا جاتا ہے کہ مادھوری دکشت کا کیریئر بنانے میں کچھ ہاتھ سروج خان کا بھی ہے۔ بالی ووڈ کی ڈانسنگ کوین مادھوری دکشت کے تقریباً ہر گانے کو سروج خان ہی کوریوگراف کیا کرتی تھیں، تیزاب کے سپر ہٹ ڈانس نمبر’ایک دو تین‘ سے سروج-مادھوری کی جوڑی مشہور ہوئی۔
اس کے بعد فلم سیلاب میں’ہم کو آج کل انتظار‘ تھانیدار میں ’تمّا تمّالوگے‘ فلم بیٹا میں ’دھک دھک کرنے لگا‘ دیوداس میں ’مار ڈالا‘ اور ’ڈولا رے ڈولا‘ یارانہ میں’میراپیا گھر آیا‘ کھلنایک میں ’چولی کے پیچھے کیا ہے ‘ جیسے گانوں میں سروج مادھوری کی جوڑی سپر ہٹ رہی۔
سروج خان کے کیریئر کی بطور ڈانس ڈائریکٹر آخری فلم کلنک تھی جس میں انہوں نے مادوری دکشت کو ’تباہ ہوگئے‘ گانے میں کوریوگراف کیا تھا۔ ماسٹر جی کے نام سے مشہور سروج خان کے دل میں مادھوری دکشت کے لئے بے حد پیار تھا اور آخری وقت تک رہا۔ ایک اوارڈ شو میں سروج خان نے کہا تھا کہ اگر مادھوری نہ ہوتیں تو سروج خان بھی نہ ہوتی۔
سروج خان کے انتقال کے بعد اب اس اوارڈ فنگشن کا ویڈیو سوشل میڈیا پر وائرل ہورہا ہے۔ اس ویڈیو میں سروج خان کافی جذباتی ہوکر بات کررہی ہیں۔ یہ اس وقت کی بات ہے جب سروج کو انڈسٹری کے ان کے سالوں کے کام کے لیے اوارڈ دیا گیا تھا اور مادھوری نے ان کے لئے ایک خوب صورت پرفارمنس دی تھی۔
سروج خان اپنے چار دہائیوں کے طویل سینما کیریئر میں دو ہزار سے زائد گانوں کے لیے کوریو گرافی کی۔ انہوں نے مادھوری دکشت اور شری دیوی کے علاوہ جوہی چاولہ، ایشوریہ رائے بچن ، تاپسی پنو، سارا علی خان، اننیہ پانڈے اور عالیہ بھٹ کو ڈانس سکھایا۔
