بالی ووڈ کے معروف نغمہ نگار جاوید اختر نے منگل کے روز اداکارہ کنگنا رناوت کے خلاف ہتک عزت کا معاملہ درج کروایا ہے۔ ممبئی کے اندھیری کورٹ میں جاوید اختر نے کنگنا کے خلاف ایک عرضی داخل کی ہے۔
گزشتہ دنوں کنگنا نے ٹی وی چینلز پر ریتک روشن سے منسلک معاملے پر جاوید اختر کے خلاف بیان دیے تھے۔ کنگنا نے کہا تھا کہ ریتک روشن معاملے میں جاوید اختر نے انہیں گھر بلا کر ریتک اور روشن خاندان سے معافی مانگنے پر دباؤ بنایا تھا۔ کنگنا کے انہی توہین آمیز بیانات پر جاوید نے شکایت درج کروائی ہے۔
کنگنا کے مطابق جاوید اختر نے کنگنا سے کہا تھا کہ روشن خاندان بڑے لوگ ہیں۔ وہ تمہیں جیل میں ڈال سکتے ہیں اور اگر ایسا ہوتا ہے تو اس کے لیے تم خود ذمہ دار ہو گی۔ رپورٹ کے مطابق کنگنا نے یہ ساری باتیں کئی ٹی وی چینلز سے بات چیت کے دوران کہی تھیں۔ کنگنا کی طرح ان کی بہن رنگولی نے بھی سوشل میڈیا پر جاوید اختر پر اسی طرح کے الزامات عائد کیے تھے۔ کنگنا کے انہی بیانات کے خلاف اب جاوید اختر نے ممبئی کے اندھیری کورٹ میں ہتک عزت کا معاملہ درج کروایا ہے۔
