بالی ووڈ اداکارہ نمرت کور ایسی شخصیت کی مالک ہیں جنہوں نے لنچ باکس اور ایئرلفٹ جیسی فلموں میں کام کرکے لوگوں کا دل جیت لیا ہے۔
اگرچہ انھوں نے بہت ساری فلموں میں کام نہیں کیا لیکن لنچ باکس اور ایئر لیفٹ میں عمدہ پرفارمنس کے ذریعہ نمرت نے لوگوں کے دلوں میں ایک بہت بڑا مقام بنا لیا ہے۔
جمعہ کے روز ڈیزائنر راگھویندر راٹھور کے اسٹور کے افتتاح کے موقع پر وہ احمدآباد آئی ہوئی تھیں۔ اس دوران انھوں نے ای ٹی وی بھارت سے خصوصی گفتگو کی۔
نمرت نے بتایا کہ راگھویندر کی ایک الگ پہچان ہے فیشن انڈسٹری میں، انہی کے اسٹور کے افتتاح کے لیے احمدآباد آنا ہوا ہے۔
جب ان سے فیشن اور اس کے کپڑوں کے تعلق سے پوچھا گیا تو انھوں نے کہا کہ فیشن میرے لیے ایک ایکسپریمینٹ ہے، میں طرح طرح کے ملبوسات استعمال کرتی ہوں۔ انھوں نے بتایا کہ وہ موسم کو بھی دیکھتے ہوئے فیشن کے کپڑوں کا انتخاب کرتی ہیں۔
نمرت نے بتایا کہ ہمیں اپنی جسمانی بناوٹ کو دیکھتے ہوئے بھی کپڑوں کا انتخاب کرنا چاہیے۔
فلموں کے حوالے سے انھوں نے بتایا کہ فلموں میں اسکرپٹ بہت ضروری ہوتی ہے۔ میں پہلے خود کو ایک آڈینس کے طور پر دیکھتی ہوں کہ کس طرح یہ کہانی دیکھنے سننے کو ملے گی اس کے بعد فلموں کا انتخاب ہوتا ہے۔
نمرت نے بتایا کہ ان کا ایک امریکن شو 'ہوم لینڈ' فروری میں آرہا ہے۔ جو بہت ہی خاص ہے ان کے لیے اس کی شوٹنگ مکمل ہو چکی ہے۔
